Արմեն Սարգսյանը պատրաստակամություն է հայտնել հանդիպել ինձ հետ.Ղազարյան
ՔաղաքականությունԱյսօր ՀՀ կառավարության շենքի բակում ՀՀ նախկին վարչապետ Նիկոլ Փաշինյանը ձեռնպահ մնաց հանրային հանդիպման մեր նախաձեռնությանը մասնակցելուց։ Հնարավոր պատճառներին կանդրադառնամ ավելի ուշ։ Այս մասին ֆեյսբուքյան իր էջում գրել է ՍԴ աշխատակազմի նախկին ղեկավար Էդգար Ղազարյանը:
«Շնորհակալություն եմ հայտնում բոլոր լրատվամիջոցների ներկայացուցիչներին մեր նախաձեռնությանն արձագանքելու և լուսաբանելու համար։
Ես այսօր հայտարարեցի, որ 2021 թվականի մայիսի 5-ին ժամը 10․00-ին հանդիպման ակնկալիքով կլինեմ Հանրապետության նախագահի նստավայրի մոտ։ Հանրապետության նախագահի հետ հանդիպման խնդրանքով ես այսօր պաշտոնապես դիմել էի նախագահի աշխատակազմ։
Քիչ առաջ ինձ հետ կապ հաստատեցին ՀՀ նախագահի աշխատակազմի Արտաքին կապերի և արարողակարգի վարչությունից և հայտնեցին, որ Հանրապետության նախագահը պատրաստակամություն է հայտնել հանդիպել ինձ հետ մինչև այս շաբաթվա վերջ, սակայն հանդիպումը վաղը հնարավոր չի կազմակերպել՝ նախագահի աշխատանքային ծանրաբեռնվածության պատճառով։
Իմ նախաձեռնությանն աջակցություն ցուցաբերող մարդկանց և լրագրողներին անհարկի չանհանգստացնելու նպատակով հայտնում եմ, որ վաղվա ժամը 10․00-ին նախագահական նստավայրի մոտ հավաքվելու անհրաժեշտություն, կարծում եմ, չկա։ Հանրապետության նախագահի հետ հանդիպման մասին ես կտեղեկացնեմ լրացուցիչ՝ այդ հանդիպման օրը և ժամը հաստատելուց անմիջապես հետո։
Դրա փոխարեն շահագրգիռ անձանց և լրատվամիջոցներին մայիսի 5-ին ժամը 12․00-ին հրավիրում եմ Ազգային ժողովի մուտքի մոտ (Բաղրամյան փողոցի կենտրոնական դարպասներ)՝ ԱԺ պատգամավորների հետ հանրային հանդիպումների ակնկալիքով»,- գրել է Ղազարյանը:
