Արմեն Սարգսյան. Աշխարհը փոխվելու է նոր ռոբոտների միջոցով

Հայաստանի նախագահ Արմեն Սարգսյանն այսօր տեսակապի միջոցով մասնակցել է «Հորասիս-Հնդկաստան» (Horasis India)
միջազգային հեղինակավոր համաժողովին, հանդես եկել «Վերափոխելով
համաշխարհային կառավարումը» թեմայով ելույթով:
Horasis-ը միջազգային հեղինակավոր հարթակ է, որն անցկացնում է
միջազգային խոշոր տնտեսական համաժողովներ, այդ թվում՝ Պորտուգալիայում
անցկացվող հեղինակավոր Horasis Global Meeting-ը։ Մասնակիցները, որոնք
երկրների առաջնորդներ են, համաշխարհային ընկերությունների ու
կորպորացիաների ղեկավարներ, հայտնի փորձագետներ ու գիտնականներ, համատեղ
քննարկում են համաշխարհային խնդիրներն ու մարտահրավերները եւ փորձում
առաջարկել լուծումներ։
«Հորասիս-Հնդկաստան»-ին մասնակցել են Horasis Vision համայնքի ավելի քան
400 բարձրաստիճան մասնակիցներ: Համաժողովի այս տարվա թեման վերաբերել է
հետհամավարակային գլոբալ մարտահրավերներին եւ դրանց հնարավոր կառավարմանը։
«Այսօր մենք ապրում ենք սրընթաց փոփոխությունների ժամանակաշրջան: Սա նշանակում է, որ մենք կարող ենք աշխարհն ավելի լավը դարձնել: Մի կողմից, այժմ
ողբերգական ժամանակաշրջան է, իսկ պատմական հեռանկարի տեսանկյունից՝ հրաշալի
ժամանակահատված, երբ պարզ է, որ ապագան դասական չի լինելու՝ մեր սրընթաց
զարգացումների, մարդկության ունեցած մեծ կարողությունների շնորհիվ:
Աշխարհը փոխվելու է՝ նոր մեքենաների, ռոբոտների, արհեստական
բանականության միջոցով: Մենք ապրում ենք միանգամայն տարբեր աշխարհում, եւ
բազում մարտահրավերներ են ի հայտ գալու: Մենք պետք է վերաարժեւորենք շատ
երեւույթներ: Մեր կյանքի շատ ոլորտներ, ինչպես ես եմ անվանում, դառնում են
քվանտային՝ սկսած համաշխարհային ռիսկերից, ինչպիսին, օրինակ, այս
համավարակն է: Վերջինս համաճարակ է դարձել ոչ այն պատճառով, որ շատ
յուրատեսակ վիրուս է, այլ այն պատճառով, որ աշխարհը փոխվել է: Հենց այս նոր
փոխկապակցված աշխարհի պատճառով է վարակն արագորեն տարածվում ամբողջ
աշխարհում»,- նշել է Արմեն Սարգսյանը:
Հայաստանի նախագահը նշել է, որ պետք էր ավելի իմաստուն գտնվել եւ մինչեւ
համավարակը գումարներ ներդնել առողջապահության, բնապահպանության
ոլորտներում:
«Բնության պահպանումը շատ կարեւոր է, քանի որ մեզնից շատերը հասկանում
են, որ ապագա համավարակներն ի հայտ կգան մարդկանց եւ բնության անառողջ
հարաբերությունների արդյունքում: Մենք այսօր խաչմերուկում ենք: Սա հիանալի
աշխարհ է, որտեղ հիմա ողբերգական ժամանակներ են: Սա նոր քվանտային աշխարհ
է: Այն, ինչ մենք ունեցել ենք անցյալում, դասական էր: Այս նոր քվանտային
աշխարհը շատերի համար անկանխատեսելի, անհայտ, դժվար եւ վախեցնող է: Նրանց
համար, ովքեր կընդունեն այս նոր աշխարհը՝ օգտագործելով նոր տրամաբանություն
եւ նոր փիլիսոփայություն, այն կդառնա մոլորակի ամենալավ վայրն ապրելու
համար»:
Պատասխանելով ստեղծված իրավիճակի ու խնդիրների հաղթահարման ուղիների, միջազգային նոր
ինստիտուտների ստեղծման մասին հարցին՝ Արմեն Սարգսյանը նշել է, որ նոր
ինստիտուտների ստեղծման անհրաժեշտություն չկա, պետք է պահել բոլոր
ինստիտուտները, կազմակերպությունները եւ վերափոխել եղած միջազգային
ինստիտուտների դերը:
«Տարիներ շարունակ ես մտածել եմ խելացի կամ հաջողակ փոքր երկրների
ակումբի մասին: Այն նպատակ ունի միավորել փոքր երկրների, որոնք
փոփոխությունների, հասկանալու, ապագային նայելու կարողություններ ունեն:
Ակումբում երկրները կփոխանակվեն գաղափարներով: Այս ակումբի ստեղծման մասին
քննարկումներ եմ ունեցել փոքր երկրների ղեկավարների հետ: Սա դաշինք,
տնտեսական, ռազմական կամ քաղաքական միություն չէ, այլ ուղղակի ակումբ է,
որտեղ կարող ես տեղեկատվություն փոխանակել: Կիսվելով՝ դու կարող ես մյուս
երկրներին ցույց տալ, թե ինչն ես լավ կամ վատ արել:
Աշխարհը փոխվում է, եւ պարտադիր չէ լինել մեծ, մեգամեծ, ունենալ
հսկայական տարածքներ, ռազմական ուժ: Փոքր երկրները կարող են իրենց ասելիքն
ունենալ համաշխարհային խնդիրների, տեղեկատվության, գիտության, կրթության
ոլորտների զարգացման վերաբերյալ: Փոքր երկրների կողմից բիզնեսի, կրթության
կառավարման հիանալի օրինակներ կան: Սա պարզապես ակումբ է, որը ցույց կտա,
որ փոքրը կարող է ոչ միայն գեղեցիկ, այլեւ հզոր եւ հաջողակ լինել»,-
ընդգծել է Հայաստանի նախագահը: