Շվեդիա - Հայաստան. Հերթական ուժեղ մրցակցին անակնկալի բերելու սպասումով (ֆոտո)
ՍպորտՖուտբոլի Հայաստանի ազգային հավաքականն աշխարհի գործող փոխչեմպիոն Խորվաթիայի հետ ոչ ոքիից 4 օր անց ընկերական հանդիպում կանցկացնի նաև Եվրո-2020-ին պատրաստվող Շվեդիայի հավաքականի հետ։ Համեմատելով հայկական թիմի նախորդ ու առաջիկա մրցակիցներին՝ կարելի է ասել, որ եթե Շվեդիայի հավաքականն այս պահին խաղամակարդակով չի գերազանցում խորվաթներին, ապա, միանշանակ, չի էլ զիջում Բալկանյան թերակղզին ներկայացնող թիմին:
Անծանոթ մրցակիցները
Հայաստանի և Շվեդիայի հավաքականները նախկինում երբեք չեն հանդիպել։ Շվեդիայի հավաքականը պատրաստվում է հունիսի 11-ից հուլիսի 11-ը կայանալիք Եվրոպայի առաջնության եզրափակիչ փուլին, իսկ Հայաստանի հավաքականի գլխավոր մարզիչ Խոակին Կապառոսը շարունակում է փորձարկումները 2022թ. աշխարհի առաջնության ընտրական փուլում սեպտեմբերին կայանալիք հանդիպումներից առաջ։ Խորվաթիայի հավաքականի հետ 4 օր առաջ տեղի ունեցած խաղում Կապառոսը խաղալու հնարավորություն տվեց մի քանի նորեկների ու քիչ խաղաժամանակ ունեցող խաղացողների։ Հայաստանի հավաքականի գլխավոր մարզիչը նախախաղային ասուլիսում հայտնեց, որ այսօր խաղադաշտ դուրս կգան այն ֆուտբոլիստները, որոնք չեն խաղացել Խորվաթիայի դեմ, այսինքն՝ այս անգամ ևս իմպրովիզների պակաս չի զգացվի իսպանացի մասնագետի կողմից։
Իհարկե, Շվեդիայի հավաքականի հետ Ստոկհոլմում խաղալն այնքան էլ հեշտ գործ չէ, սակայն Խորվաթիայի դեմ նախորդ հանդիպման արդյունքն ու Եվրո-2020-ին պատրաստվող թիմերի՝ վերջին ընկերական խաղերում ցուցադրած խաղը Հայաստանի հավաքականի համար ստեղծում է բոլոր նախադրյալները, որ հերթական ուժեղ մրցակցին անակնկալի բերելն ամենևենին իրատեսական է: Եվրոպայի առաջնության նախաշեմին առաջատար հավաքականները կարծես խնայում են ուժերը, չեն ցուցադրում իրենց ամբողջ ներուժն ու փորձում խուսափել վնասվածքներից։
Նախորդ խաղերը
ԱԱ-2022-ի ընտրական փուլում Հայաստանի հավաքականը մարտին հաղթել է Լիխտենշտեյնի (1:0), Իսլանդիայի (2։0) ու Ռումինիայի (3։2) հավաքականներին, իսկ Շվեդիայի թիմն ուժեղ է գտնվել Վրաստանից (1։0) ու Կոսովոյից (3։0)։ Մարտին Շվեդիայի հավաքականն ընկերական հանդիպում է անցկացրել նաև էստոնացիների հետ՝ հաղթելով նվազագույն հաշվով։ Յանե Անդերսոնի գլխավորած թիմը նախորդ հանդիպումն անցկացրել է մայիսի 29-ին։ Ստոկհոլմի «Ֆրենդս Արենա» ստադիոնում տեղի ունեցած ընկերական խաղում մրցակիցն էր Ֆինլանդիայի հավաքականը, որը պարտություն կրեց 0։2 հաշվով։
Հայաստանի հավաքականը նախորդ ընկերական հանդիպումը հունիսի 1-ին անցկացրել է Խորվաթիայի հավաքականի հետ և հասել ոչ ոքի արդյունքի։ Եթե առաջին խաղակեսում խորվաթների առավելությունն ակնհայտ էր, ապա ընդմիջումից հետո Խոակին Կապառոսի գլխավորած թիմը զգալիորեն ավելացրեց և կարողացավ խուսափել պարտությունից՝ 1։1։
Առանց Զլատան Իբրահիմովիչի մնացած մրցակիցը
Ֆուտբոլի միջազգային ֆեդերացիայի (ՖԻՖԱ) դասակարգման աղյուսակում Շվեդիայի հավաքականը զբաղեցնում է 18-րդ տեղը (Հայաստանը 90-րդն է)։ 2016 թվականից Շվեդիայի հավաքականը գլխավորում է 58-ամյա շվեդ մասնագետ Յանե Անդերսոնը, որը ազգային թիմին միանալուց առաջ աշխատել է միայն շվեդական ակումբներում։ Այս ընկերական խաղերով Շվեդիայի թիմը պատրաստվում է Եվրո-2020-ի եզրափակիչ մրցաշարին, որի խմբային փուլում կմրցի Իսպանիայի, Լեհաստանի ու Սլովակիայի հավաքականների հետ։
Հատկանշական է, որ Յանե Անդերսոնը Հայաստանի դեմ խաղի մեկնարկային կազմը հրապարակել էր հանդիպումից մեկ օր առաջ։ Տանտերերի կազմում մեկնարկային րոպեներից հանդես կգան Ռոբին Օլսենը («Էվերտոն»), Միկայել Լուստիգը (ԱԻԿ), Մարկուս Դանիելսոնը («Դոլյան Իֆան»), Վիկտոր Լինդելյոֆը («Մանչսթեր Յունայթեդ»), Պիեր Բենգտսոնը («Վայլե»), Սեբաստիան Լարսոնը (ԱԻԿ), Ալբին Էկդալը («Սամպդորիա»), Կրիստոֆեր Օլսոնը («Կրասնոդար»), Էմիլ Ֆորսբերգը («Լայպցիգ»), Ալեքսանդր Իսակը («Ռեալ Սոսյեդադ»), Դեյան Կուլուշևսկին («Յուվենտուս»)։
Իտալական «Միլանի» 39-ամյա հարձակվող Զլատան Իբրահիմովիչն այս տարվա մարտին մոտ 5 տարվա ընդմիջումից հետո վերադարձավ Շվեդիայի հավաքական, որպեսզի մասնակցի Եվրո-2020-ին, սակայն վերջերս վնասվածք ստացավ և չի օգնի ազգային թիմին։ Ասել, թե Իբրահիմովիչն ինչ դերակատարում կարող էր ունենալ սկանդինավյան թիմում, կստացվի ոչինչ չասել։ Նախկինում հարձակվողը Շվեդիայի հավաքականում հանդես էր եկել 2001-2016-ը և 116 խաղում դարձել 62 գոլի հեղինակ: Նա ազգային թիմի պատմության լավագույն ռմբարկուն է:
Ծանոթ մրցավայրը
Հանդիպումը տեղի կունենա Շվեդիայի մայրաքաղաք Ստոկհոլմի «Ֆրենդս Արենա» ստադիոնում, որը ֆուտբոլային խաղերին հյուրընկալում է 50 հազար հանդիսական։ Մայիսի 29-ին այս ստադիոնում տեղի ունեցած Շվեդիա – Ֆինլանդիա ընկերական հանդիպումն անցկացվել է առանց հանդիսականների, և սպասվում է, որ այս խաղը ևս կանցնի դատարկ տրիբունաների ներքո։
2017 թվականին «Ֆրենդս Արենայում» տեղի է ունեցել Եվրոպայի լիգայի եզրափակիչը, որտեղ անգլիական «Մանչեսթեր Յունայթեդը» 2։0 հաշվով հաղթել էր հոլանդական «Այաքսին»։ Այդ խաղում անգլիական ակումբի գոլերից մեկը խփել էր այժմ իտալական «Ռոմայում» հանդես եկող 32-ամյա կիսապաշտպան Հենրիխ Մխիթարյանը, որը չի հրավիրվել Հայաստանի ազգային հավաքականի այս հավաքին։
Բուքմեյքերների կարծիքը
Բուքմեյքերական գրասենյակները բացահայտ ֆավորիտ են համարում Շվեդիայի հավաքականին, որի հաղթանակը միջինը գնահատում են 1.22 գործակցով։ Հայկական թիմի հաղթանակը ստացել է 11.00 գործակից, իսկ ոչ ոքին՝ 5։75։
Ընկերական հանդիպում
Շվեդիա - Հայաստան՝ 22։45 (Երևանի ժամանակ)
Գլխավոր մրցավար՝ Մատիաս Գեստրանիուս (Ֆինլանդիա)
Ֆոտո՝ ՀՖՖ
