«Առ այսօր որևէ միջամտության չեմ դիմել, որովհետև համերաշխ եմ ինքս ինձ հետ, տարիքս չեմ թաքցնում»․ Նունե Եսայանի տարեդարձի ամենակարևորն նվերն ու երջանկությունը

Երգչուհի Նունե Եսայանն այսօր տոնում է ծննդյան տարեդարձը, նա դառնում է 52 տարեկան։ Այս առիթով Tert.am Life–ը զրուցել է երգչուհու հետ։

«Օրս սկսել եմ շնորհավորանքներ ստանալով և ծաղիկներով առաջինը՝ ընտանիքիս, հետո շատ կարևոր մարդկանց կողմից։ Երգչի համար ծաղիկներն ամենակարևոր նվերն են։ Նյութական նվերով ոչ ոքի չես զարմացնի, ինձ համար վերաբերմունքն ու հարաբերություններն են ամենակարևորը։ Տարեդարձս ընտանիքիս հետ նշել սկսել ենք ուղիղ կեսգիշերին, միմյանց շնորհավորեցինք, որ իրար ունենք։ Ես երջանիկ եմ, որ ունեմ այս ամենը, այս ընտանիքը։ Իմ ամուսինը՝ Ավոն, մեր երեխաները՝ Հենրին և Էլիզաբեթը, իմ մեծ ընտանիքը, իմ երջանկությունն են»,– ասաց երգչուհին ու հավելեց, որ երեկոյան օրը կտոնեն իրենց տանը՝ ամենահարազատ մարդկանց հետ։

Նունեն սովորաբար օրը նշանավորում է նաև աշխատանքային նորությամբ, այս տարի այդպես չեղավ, ասում է՝ հավաք կամ համերգ չկազմակերպելու պատճառը համավարակն է, սակայն Կիպրոսում օրեր առաջ համերգ է ունեցել, որն էլ համարել է նախածննդյան հավաքույթը։

Առաջիկայում երգչուհին նոր երգ կթողարկի, որի երաժշտության հեղինակն ինքն է, խոսքերը հենց այսօր նվեր է ստացել Ավետ Բարսեղյանից․ «Հուսով եմ՝ շատ չի ուշանա։ Երգը սիրային թեմայով է, այն կլինի նվեր և՛ ինձ համար, և՛ իմ կողմից՝ ընտանիքիս»։

Երգչուհին շեշտում է, թե որքան երջանիկ է։ Հենց դրանով է պայմանավորում իր երիտասարդ ու առույգ լինելը։ Ասում է՝ մեծանալուց չի վախենում։

«Ես շատ հաշտ եմ տարիքիս հետ։ Ամենակարևորն այն է, որ ֆիզիկապես լավ զգամ ինձ, ուժ ունենամ երգելու։ Նայում եմ շուրջս ու շնորհակալություն հայտնում Աստծուն, որ տարբերվում եմ իմ տարեկիցներից։ Դա առաջին հերթին գենն է, հետո մարդու ապրելակերպն ու երջանկությունը։ Երբեք չեմ վախենում ասել իմ տարիքը։ Դա շատ նորմալ է, առաջ ենք գնում ոչ թե հետ, պետք է մեծանանք, դրանից փախուստ չկա։ Ես իմ կնճիռների հետ էլ եմ շատ հաշտ։ Բա մարդու դեմքին պետք է երևա իր իմաստնությունը, խելամտությունը, որոնք ուղիղ կապ ունեն իր տարիների հետ։ Հենց դա է գեղեցկացնում։ Ցավում եմ, որ հիմա 20 տարեկան դիմում են միջամտությունների, փոխում իրենց։ Հասկանում եմ, որ մեծ տարիքում կարելի է որոշակի թերություններ շտկել, սակայն երիտասարդ տարիքում այդքան բան փոխել։  Ինքս առ այսօր որևէ միջամտության չեմ դիմել, բայց ոչ թե որովհետև դեմ եմ, այլ որովհետև համերաշխ եմ ինքս ինձ հետ։ Մարդն ինքն իր հետ պայքար է սկսում, երբ ներքին համերաշխությունը խախտվում է»,– ասաց երգչուհին։