«Ջուջուլակերներն» ու պետության վախճանը. մեղքը նախկինների վզին փաթաթելու նուրբ արվեստը

Նիկոլ Փաշինյանի հայտնի հարյուր փաստերի մեջ, իհարկե, դուք չեք գտնի մի ակնհայտ, չափազանց անխնամ կերպով թաքցվող փաստ՝  «Հայկական ժամանակ»-ի խմբագրականները շարունակում է գրել ժողովրդի վարչապետը, թերևս լավ իմանալով, որ մեկ ուրիշի հանձնարարելու դեպքում, ինչպես փաշինյանական ամբողջ թիմում, այդ մի գործն էլ են «պրավալ» տալու...

Եվ այսպես, օրեր առաջ իր խմբագրականում Փաշինյանը դժգոհում է նախկին իշխանություններից, որ նրանք խոսում են ոչ թե այն մասին, թե ինչ լավն են (էին) իրենք, այլ այն մասին, թե ինչ վատն են գործող իշխանությունները...

Սա ասում է մի մարդ, ում թե ընդդիմադիր, թե իշխանական գործունեությունը ամբողջովին կառուցված է եղել հակադրության, ատելության և թշնամական դիսկուրսի վրա...

Փաշինյանը մի բան կամ չի հասկանում, կամ չհասկանալու է տալիս, որ որպեսզի նախկին իշխանությունների և նրանց սատարող ուժերի դիսկուրսը ծավալվի այլ հարթության մեջ, ինքը և իր իշխանությունը առնվազն մի քիչ, մի չնչին տոկոս պետք է լավը լինեին նախկիններից...

Համաձայնվենք, որ շատ կոմֆորտ է հագնել նախկինների կարած և քո կողմից ամենավերջին լուտանքների արժանացած սահմանադրական կոստյումը, եռապատկել «ախռանիկների» ու աղախինների բանակը, քառասունհինգ հազար դոլարանոց վարսավիր պահել, բառացիորեն սեռական բռնության ենթարկել սահմանադրական ինստիտուտներն ու արդարադատությունն ընդհանրապես և մի հատ էլ մուննաթ գալ՝ նախկինները ասում են՝ դու լավը չես... Եղբայր, դու ախր անընդհատ ավելի վատն ես դառնում, ու հենց այդտեղ ես նախկիններին քո վրա մուննաթ գալու բարոյական իրավունք տալիս...

Հոդվածի հեղինակը, ըստ էության, չի էլ կարողանում փախչել իրականությունից և ֆիքսում է. «Ուշագրավն այն է, որ այս քննադատությունները հիմնականում տեղին են։ Այո, իսկապես էլ՝ նախկին իշխանությունների օրոք ու նրանց մասնակցությամբ տեղի ունեցած ահռելի թալանի միայն մի չնչին մասն է վերադարձվել, ռուսներն իսկապես էլ միջազգային գների անկման ֆոնին թանկացնում են գազը՝ վստահ լինելով, որ դա սոցիալական խնդիրներ կառաջացնի, Ադրբեջանն էլ մեզանից անընդունելի զիջումներ է ակնկալում ու սպառնում պատերազմով»...

Թալանի մասով. այդ դուք եք տասնամյակներ շարունակ հրապարակ նետել թեզը՝ ժողովուրդ, դուք վատ եք ապրում, որովհետև ձեզ թալանել են, տվեք մեզ իշխանություն և մենք կոպեկ - կոպեկ այդ փողերը հետ կբերենք և դուք տանը, հեռուստացույցի առաջ փռված, կսկսեք առոք - փառոք ապրել... Տասնամյակների ձեր գեներացրած ատելությամբ գալով իշխանության՝ հասկացաք, որ աղքատությունը պողոսների գլխի մեջ է, իսկ այդ պողոսները ձեզնից ոչ թե ռեալ գործ էին ուզում, այլ ձեր միֆականացրած «թալանյալ» միլիարդները, որը, ինչպես տեսաք, չկա...

Յուրաքանչյուր, այդ թվում ձեր իշխանության մեջ ատկատներ, ապօրինի հարստացում և կոռուպցիա, անշուշտ, կա, բայց ձեր երազած թալանը չտեսնելով, հասկացաք, որ ամբողջական «պրավալ» եք գնում...

Ինչ վերաբերում է ռուսական գազին, ախր բացեիբաց խոստովանում ես, որ դա քո մեղքն է, քո փնթի, տնավարի արտաքին քաղաքականության, կամ, ավելի շուտ, դրա բացակայության արդյունքը...
Տարիներ շարունակ նույն նախկիններին մեղադրում էիր՝ գազը թանկ եք ծախում, հայ - հարայ, թալանում եք, ու ինչ պարզվեց՝ թե խաղ էին կանչում, թե ջանգյուլում երգում՝ գազը չէր թանկանում, Ռուսաստանն էլ ստաբիլ հարաբերություն էր պահում Հայաստանի հետ...

Հիմա՝ ումից ես նեղանում, Նիկոլ Վովայիչ... Ընդդիմադիր հռետորաբանությամբ ու ամեն ինչը նախկինների վրա գցելու փնթի գործելաոճով ամեն ժամ դու պետությունը «վարի ես տալիս», ու վատն այն է, որ դա անում ես՝ գիտակցելով, որ դու և քո թիմը կատարյալ ձախողված եք բոլոր ոլորտներում...

Իսկ էն փնթիների ոհմակը, որ քո ջուջուլակերների դասն է գոյացրել, մի օր քեզ քարշ է տալու կառափնարան...

Հուսանք՝ քաղաքական կառափնարան...

Տիգրան Միրզոյան