Զորքերը բերվել են մարտական պատրաստականության վիճակի․ իրադրությունը Սերբիա-Կոսովո սահմանին 

Սերբիայի նախագահ Ալեքսանդր Վուչիչը կարգագրել է բանակը բերել առավելագույն մարտական պատրաստականության վիճակի։ Այս մասին հայտարարություն է տարածել սերբական ռազմական գերատեսչությունը Բելգրադում։ Իրավիճակը սերբա-կոսովյան գոտում սրվել է այն բանից հետո, երբ Կոսովոն որոշում է կայացրել սահմանին տեղակայել հատուկ նշանակության ոստիկանական ուժեր։ Այս մասին հայտնում է DW-ն, նշելով, որ Կոսովոյի այս քայլը սերբական կողմը գնահատել է որպես սադրանք։ Նշենք, որ կոսովյան իշխանությունները այդ որոշումը կայացրել են հյուսիսային հատըվածում գտնվող երկու սահմանային անցակետերի առնչությամբ, որտեղ հիմնականում ապրում են էթնիկ սերբեր, ովքեր չեն ճանաչում Պրիշտինայի կառավարությանը, որտեղ իշխանությունը պատկանում է էթնիկ ալբանացիներին։ Տեղացի սերբերը դուրս են եկել բողոքի ցույցերի եւ փակել ճանապարհներ։ ԵՄ-ն եւ ՆԱՏՕ-ն առայժմ սահմանափակվել են զսպվածության կոչով։