Նիկոլ Փաշինյանը տեղեկացնում է
ՔաղաքականությունԿառավարությունը 2021 թվականի բյուջեից ՀՀ մարզպետարաններին կհատկացնի 532 մլն դրամ՝ սուբվենցիոն ծրագրերով համապատասխան շինարարական կազմակերպությունների նկատմամբ ֆինանսական պարտավորությունները կատարելու համար: Այս հարցը կառավարության հերթական նիստին ներկայացրեց տարածքային կառավարման և ենթակառուցվածքների նախարար Գնել Սանոսյանը։
Նիկոլ Փաշինյանը ամփոփ տվյալներ ներկայացրեց 2018–2020 թվականներին սուբվենցիոն ծրագրի մասին և հայտնեց, որ այդ շրջանակում 1193 ծրագիր է իրականացվել, ընդհանուր ներդրման գումարը ավելի քան 47 միլիարդ դրամ է կազմել և ներկայացրեց այդ ծրագրերի բովանդակությունը և վիճակագրությունը՝ ըստ մարզերի։
«Երբ ծրագրերը վերլուծում ենք, հասկանալի է դառնում, որ 2018–2020 թվականներին մենք գործնականում պետք է չունենանք գեթ մեկ բնակավայր, որտեղ շատ կոնկրետ, շոշափելի սուբվենցիոն ծրագրեր չեն իրականացվել»,–ասաց նա և նշեց, որ սուբվենցիոն ծրագրերում առաջատար են արդեն խոշորացված համայնքները։
Նիկոլ Փաշինյանը հայտնեց, որ 2021 թվականին դեռ ընթացքի մեջ է 678 ծրագիր՝ 48 միլիարդ 419 միլիոն դրամ արժեքով։ «2021 թվականին արդյունքներով մենք կարող ենք ասել, որ Հայաստանի Հանրապետությունում չի կարող լինել գեթ մեկ համայնք, որտեղ շատ շոշափելի, տեսանելի, էական կապիտալ ներդրում չի իրականացվել։ Այսօր կառուցվում, վերակառուցվում են փողոցներ, որտեղ 30 տարի ոչ մի աշխատանք չի կատարվել, նորոգվում են դպրոցներ, մանկապարտեզներ, որոնք տասնյակ տարիներ չեն նորոգվել։ Իմ դիրքորոշումը եղել է այն, որ բովանդակություն ունեցող սուբվենցիոն ծրագրերն ընդհանրապես չպետք է մերժի կառավարությունը»,–ասաց նա։
Գնել Սանոսյանը նշեց, որ աշխատողների պակաս կա, քանի որ մեծ մրցույթներ են շահել շինարարական կազմակերպությունները, սակայն աշխատողներ չկան։ Շարունակելով թեման՝ Նիկոլ Փաշինյանը ավելացրեց, որ այսօր ՀՀ–ում արձանագրված հազարավոր թափուր աշխատատեղեր կան և ամենահաճախ տրվող ահազանգը աշխատուժի խնդիրն է։ «Մենք այս հարցը պետք մեր աչքի առաջ ունենանք»,–ասաց նա, նաև նշեց, որ արոտավայրերի գերակշիռ մասը չի օգտավործվում՝ գրեթե 70–80 տոկոսը, և հիմնական պատճառը ենթակառուցվածքների հարցն է։
