Մենք սովոր ենք, 30-32 տարի այդ կրակոցների տակ ենք ապրում. գիշերը խաղաղ չէր Տավուշում

Այս գիշերվա կրակոցները եղել են գյուղ Չինարիի ներքևի հատվածում: Գիշերը ադրբեջանցիների դիրքերից եղել է մեկ-երկու կրակոց, այն տևել է մոտավորապես 5-10 րոպե: Այս մասին ԼՈՒՐԵՐ.com-ի հետ զրույցում ասաց Տավուշի մարզի Չինարի գյուղի գյուղապետը՝ Սամվել Սաղոյանը՝ հավելելով, որ այդ դեպքից հետո դեռ որևէ կրակոց չի հնչել:

Վերջինս նշեց, որ կրակոցի ձայները գյուղում հնարավոր չէր, որ չլվսեին, քանի որ վերջին տունն ադրբեջանցիների հենակետից հեռու է մոտավորապես 500 մ: Գյուղապետը նշեց, որ անգամ կրակոցի ձայները լսելիս գյուղում որևէ խուճապ չկար. «Մենք սովոր ենք, 30-32 տարի այդ կրակոցների տակ ապրում ենք, մեզ համար սովորական է դարձել»,- ասաց Սամվել Սաղոյանը:

Զրուցեցինք նաև Տավուշի մարզի Բերդ համայնքի ղեկավարի տեղակալ Սամվել Հովսեփյանի հետ, որն ասաց կրակոցներ որպես այդպիսին, չեն եղել՝ միջդիրքային էին, գյուղի ուղղությամբ չէին: 

Մեր ճշգրտող հարցին, թե արդյոք Չինարի գյուղի ուղղությամբ որևէ կրակոց չի հնչել, համայնքի ղեկավարի տեղակալը երկար մտածելուց հետո պատասխանեց. «Դե, հա»:

Հիշեցնենք, որ ավելի վաղ ՊՆ-ն հայտարարություն էր տարածել, որ երեկ ուշ երեկոյան Ադրբեջանի զինուժը անկանոն կրակ է բացել Տավուշի որոշ ուղղություններով. հակառակորդի կրակը լռեցվել է:

Զվարթ Պետրոսյան