Փաշինյանն առաջարկել է հայ-վրացական առեւտրաշրջանառությունը հասցնել 1 միլիարդ դոլարի
ՔաղաքականությունՀայաստանի եւ Վրաստանի միջեւ, ըստ Թբիլիսիում աշխատանքային այցով գտնվող ՀՀ վարչապետ Նիկոլ Փաշինյանի հայտարարության, առեւտրաշրջանառությունը աճել է 10 տոկոսով եւ կազմել է ավելի քան 600 միլիոն դոլար։ Նիկոլ Փաշինյանը առաջարկել է Վրաստանին շարունակել աշխատանքն ու հասնել մի քանի տարի առաջ դրված նպատակին՝ հայ-վրացական առեւտրաշրջանառությունը հասցնել 1 միլիարդ դոլարի։
Նշենք, որ Նիկոլ Փաշինյանը Թբիլիսի այցելել է հայ-վրացական միջկառավարական տնտեսական հանձնաժողովի նիստի առիթով։ Այցի ընթացքում նախ կայացել է Հայաստանի եւ Վրաստանի վարչապետների հանդիպումն ու առանձնազրույցը, որից հետո արդեն մեկնարկել է հանձնաժողովի նիստը, որը նախագահում են երկու երկրների վարչապետները։ Նիկոլ Փաշինյանը հիշեցրել է, որ հայ-վրացական առեւտրաշրջանառությունը 1 միլիարդ դոլարի հասցնելու նպատակը դրվել է 2019 թվականին եւ կորոնավիրուսային պանդեմիան այդ գործընթացը դանդաղեցրել էր, իսկ հիմա ինքն առաջարկում է շարունակել այս ուղղությամբ աշխատանքները՝ դրված նպատակին հասնելու համար։ Փաշինյանը նաեւ ասել է, որ չնայած դժվարություններին, որոնք իր հետ բերել է պանդեմիան, երկու երկրների միջեւ հարաբերությունները շարունակում են զարգանալ եւ որակապես նոր մակարդակի են բարձրացել։
Նշենք, որ հայ-վրացական միջկառավարական տնտեսական հանձնաժողովի նիստը պետք է կայանար 2020 թվականին, սակայն չկայացավ՝ աշխարհում տիրող բարդ համաճարակային իրավիճակի պատճառով։ Հայաստանի վարչապետը նաեւ ասել է, որ Վրաստանում կա 400 ընկերություն, որոնք ստեղծվել են հայկական կապիտալի օգնությամբ եւ հատկապես ինտենսիվ են զարգացնում տրնսպորտային լոգիստիկայի ոլորտում համագործակցությունը Հայաստանի եւ Վրաստանի միջեւ։ Էներգետիկայի ոլորտում եւս պլանավորված նոր նախագծեր կան, իր հերթին հայտարարել է Վրաստանի Էկոնոմիկայի եւ կայուն զարգացման նախարար Նատիա Տուրնավան։
