Ցավներդ տանեմ, ախր երկիրը ֆեյսբուքով չեն կառավարում, 200 հազար դոլարանոց մեքենա չեն գնում. Հայկ Մարության
Վիդեո«Պաշտոնապես ասում եմ՝ դուրս եմ եկել «Քաղաքացիական պայմանագիր» կուսակցությունից, բայց դուրս չեմ եկել «Իմ քայլը» դաշինքից»: Այս մասին այսօր՝ դեկտեմբերի 22-ին, ավագանու նիստում ասաց Երևանի քաղաքապետ Հայկ Մարությանը։
«2018թ Հայաստանի ժողովուրդը հեղափոխություն իրականացրեց, որին բոլորը մասնակից են եղել և յուրաքանչյուրն իր լուման է ներդրել այդ կարևոր գործում։ Հեղափոխությունից հետո առաջին ընտրությունները Երևանի ավագանու ընտրություններին էին, որտեղ իրենք՝ որպես քաղաքական թիմ խնդիր ունեին ջախջախիչ հաղթանակ տանելու և թղթի վրա հստակ ամրագրելու ժողովրդի կամքը, ինչն էլ թույլ կտար գնալ ԱԺ ընտրություններին և ամրագրել այդ հաղթանակը, ինչի նպատակով էլ ստեղծվեց հեղափոխական «Իմ քայլը» դաշինքը»,- նշեց քաղաքապետը ։
Մարությանի դիտարկմամբ՝ ավագանու կազմում «Իմ քայլը» դաշինքով ընտրված առաջին 57 անդամներից միայն 27-ն էին այդ պահին «Քաղաքացիական պայմանագիր» կուսակցության անդամ, այսինքն, խմբակցության մեծ մասը՝ 30 ավագանու անդամն անկուսակցականներ էին կամ այլ կուսակցության անդամներ, ինչը, ըստ Մարությանի, հատկանշական տվյալ է, որն արտացոլում է հեղափոխական թիմի իրական պալիտրը։
«Ընտրությունների արդյունքում մենք ունեցանք համոզիչ հաղթանակ՝ հավաքելով ձայների մոտ 80 տոկոսը։ Ժողովուրդն իր ձայնը չտվեց որևէ կուսակցության, ժողովուրդն իր ձայնը տվեց «Իմ քայլը» դաշինքին, իր ձայնը տվեց հեղափոխությանը, հեղափոխական թիմին, հեղափոխության լիդեր Նիկոլ Փաշինյանին, քաղաքապետի թեկնածու Հայկ Մարությանին, թիմում ընդգրկված հայտնի և հարգված մարդկանց՝ Արթուր Իսպիրյանին, հայտնի ճարտարապետ Արսեն Կարապետյանին, հայտնի բլոգեր Իզաբելլա Աբգարյանին»,-նշեց Մարությանն՝ ընդգծելով, որ հեղափոխական թիմը ընտրությունների չգնաց «ՔՊ» կուսակցության դրոշի ներքո՝ ոչ միայն նրա համար, որ հեղափոխությունը արեց ամբողջ ժողովուրդը, այլ նրա համար, որ «Քաղաքացիական պայմանագիր» կուսակցություն անունը լայն զանգվածներին այն ժամանակ ուղղակի ծանոթ չէր։
Մարությանն արձանագրեց, որ 2018թ Երևանի քաղաքապետի ընտրությունների ժամանակ ժողովուրդն ընտրեց «Ւմ քայլը» հեղափոխական դաշինքը։
