Հեռակա բանավեճ և փոխադարձ մեղադրանքներ․ Ադրբեջանը սրում է իրավիճակը
Քաղաքականություն
Ադրբեջանը փորձում է նոր սրման գնալ Հայաստանի հետ հարաբերություններում՝ մեր երկրին մեղադրելով ապակառուցողական դիրքորոշման մեջ։ Ադրբեջանի ԱԳ նախարար Ջեյհուն Բայրամովը հայտարարել է, թե երկու շաբաթ առաջ Հայաստանը հանդես է եկել սահմանազատման նոր առաջարկներով ու որոշ պայմաններ է առաջ քաշել այդ նպատակով նախատեսվող հանձնաժողովի աշխատանքները սկսելու համար։ Ադրբեջանը հայտարարել է, որ կարող է սկսել այս գործընթացը, բայց առանց որևէ պայմանի։
«Միջազգային սահմանները պետք է ճանաչվեն. Հայաստանը, որը 30 տարի օկուպացրել է ադրբեջանական հողերը, չունի իրավական, քաղաքական կամ բարոյական իրավունք սահմանների սահմանազատման հարցում որևէ պայման դնելու», - հայտարարել է Ադրբեջանի արտգործնախարարը: «Ցավոք, հայկական կողմը խախտել է եռակողմ աշխատանքային խմբի գործունեությունը։ Դեռևս չենք տեսնում այդ հարցում հետևողականություն։ Երբեմն դրական ուղերձներ են ստացվում, երբեմն էլ լսում ենք այլ կարծիքներ, ինչը բարդացնում է իրավիճակը», - ասել է Ադրբեջանի արտգործնախարարը՝ առանց մանրամասներ նշելու։
Հայաստանի ԱԳՆ մամուլի խոսնակ Վահան Հունանյանը շտապել է արձագանքել այս մեղադրանքներին, նշել է, թե Ադրբեջանը հայկական կողմի առաջարկներին որևէ բովանդակային արձագանք չի տվել, բայց մերժել է դրանք՝ փոխարենը չառաջարկելով երեք երկրների ղեկավարների պայմանավորվածությունները կյանքի կոչելու տարբերակներ։ ԱԳՆ խոսնակը հավելել է, որ Հայաստանի առաջարկները «պայման», «նախապայման» անվանելը, ապա դրանց վերաբերյալ բարոյական, քաղաքական, իրավական գնահատականներ հնչեցնելը «ոչ մի տրամաբանական կապ չունի վերը նշված գործընթացի հետ»: Ադրբեջանի ԱԳ նախարարի հայտարարությունը, թե Հայաստանը վիժեցրել է եռակողմ աշխատանքային խմբի գործունեությունը, Հունանյանը որակել է «առնվազն տարօրինակ»:
Հեռակա այս բանավեճը վկայում է, որ Ադրբեջանը դժգոհ է ստեղծված իրավիճակից, ինչպես նաև սահմանազատման ու սահմանագծման գործընթացում հնարավոր զարգացումներից, փորձում է վիժեցնել այդ գործընթացը և նոր սրման գնալ։ Պատրա՞ստ է արդյոք Հայաստանի իշխանությունը նոր առճակատման, կկարողանա՞ դիմագրավել թշնամու նոր սադրանքներին։ Այս հարցն է, որի պատասխանն ունենք բոլորս, սակայն չենք բարձրաձայնում։ Պատերազմում կրած պարտությունից հետո կորցրած ամեն վայրկյանը դավաճանություն է հայկական շահերի դեմ, և այս իշխանությունների երբեմն երկչոտ, երբեմն էլ խրոխտ հայտարարությունները արդեն միայն սթափեցնում են, հասկանալով, որ նոր մարտահրավերներ են սպասվում, որոնց դիմագրավելու ռեսուրս ու կարողություն փաշինյանական իշխանությունը չունի։
Աշոտ Հարությունյան
