Ծաղր Հայաստանի նախագահի ինստիտուտի նկատմամբ

Հայաստանի նախագահի պաշտոնում իշխող «Քաղաքացիական պայմանագիր» կուսակցության կողմից առաջադրված Վահագն Խաչատուրյանը, պարզվում է, անկուսակցական չի եղել, առնվազն մինչև երեկ։ Խաչատուրյանը երեկ է դիմում ներկայացրել Հայ ազգային կոնգրեսի վարչության քարտուղար Սամվել Աբրահամյանին և խնդրել իրեն հեռացնել կուսակցությունից։ Նախագահի թեկնածուն Հայ ազգային կոնգրեսի վարչության անդամ է եղել, թեև, ինչպես նշում են ՀԱԿ-ից, մի քանի տարի կուսակցության գրասենյակ չի էլ մտել։ Նա իրեն Փաշինյանի թիմի անդամ է համարում։ Ինքը՝ Փաշինյանը հստակ հանձնարարականներ է տվել ՀՀ ապագա նախագահին, կառավարության երեկվա նիստում։

«Այո՛, Սահմանադրության բերումով հանրապետության նախագահը, ըստ էության, վերկուսակցական գործունեություն է ծավալում և առաջնորդվում է ազգային և համազգային, պետական շահերով: Ես հավատացած եմ, որ կառավարությունը նույնպես առաջնորդվում է պետական, ազգային և համազգային շահերով: Խորհրդարանը նույնպես առաջնորդվում է այդ շահերով: Այստեղ պիտի գործի իշխանությունների բաժանման սկզբունքը. Սահմանադրությունը հստակ գծագրել է, թե իշխանության տարբեր թևերն ինչ լիազորություններ ունեն և ինչպես պետք է համագործակցեն: Եվ, այո՛, շատ կարևոր եմ համարում, որ իշխանության թևերը մեկը մյուսին լրացնեն և ոչ թե հակադրվեն, ինչը չի նշանակում, որ չկա բանավեճ»,- ասել է նա՝ միաժամանակ հավելելով, թե կուսակցության վարչության ու խմբակցության միջև կա ներդաշնակություն, և այդ ներդաշնակությունն ակնկալում են նաև Խաչատուրյանից։

Ըստ էության, վարչապետի պաշտոնը զբաղեցնող անձը առաջիկայում նախագահի պաշտոնը զբաղեցնող անձին հրապարակային նվաստացման է ենթարկում՝ բացատրելով, որ նա ոչ թե երկրի նախագահն է, այլ իր աշխատողը, ենթական և ստորագրյալը։ Արժանապատվություն ունեցող ցանկացած գործիչ այս հայտարարություններից հետո թափ կտար ձեռքը, գործող վարչախմբին իր ղեկավարով հանդերձ, կուղարկեր համապատասխան ուղղությամբ, և կհեռանար։ Բայց այս իշխանության մեջ այդպիսիք չկան։

Կարեն Տիգրանյան