Դատավորին կալանավորեցին, որ մյուսների աչքը վախացնեն
Քաղաքականություն
Առաջին ատյանի դատարանը երեկ բավարարել է Ազգային անվտանգության ծառայության միջնորդությունն ու որոշել կալանավորել Սյունիքի մարզի դատարանի դատավոր Բորիս Բախշիյանին։ Դատավորը մեղադրվում է անձին ապօրինի կալանավորելու համար, որն առաջացրել է ծանր հետևանքներ: 36-ամյա Բախշիյանը չի ընդունում մեղադրանքը, պնդում է, թե իր հետ տեղի ունեցող գործընթացը ուղիղ միջամտություն է դատավորի լիազորությունների իրականացմանը։
Ըստ մեղադրանքի` Բախշիյանը ապօրինի կալանավորել է Քաջարանի համայնքապետ Մանվել Փարամազյանի գործով անցնող ամբաստանյալին՝ Նվեր Մկրտչյանին։ Վերջինս Փարամազյանի դեմ ցուցմունք տված անձն է: Մկրտչյանը դեկտեմբերին տեղի ունեցած նիստին չէր ներկայացել, ինչը դատարանն անհարգելի էր համարել ու խափանման միջոց ստորագրությունը փոխարինել էր կալանքով։ Գլխավոր դատախազությունից պարզաբանել էին, որ դատավոր Բորիս Բախշիյանը Նվեր Մկրտչյանին ակնհայտորեն առանց հիմքերի, առանց նրան լսելու ու դիրքորոշմանը ծանոթանալու է կալանավորել։
Դատավորի նկատմամբ այս վերաբերմունքն այնքան անհեթեթ և իմաստազուրկ է, որ զարմացել են նույնիսկ իշխանամերձ իրավաբանները, իսկ իրավաբանական հանրույթն ընդհանրապես ցնցված է։ Զարմանալի ոչինչ, իրականում, տեղի չի ունեցել։ Դատական համակարգը ծնկի բերելու գործընթացի շրջանակներում Նիկոլ Փաշինյանն ընդամենը այսկերպ ցանկանում է ահաբեկել մյուս բոլոր դատավորներին, կոտրել անկախ դատավորների կամքը։ Բորիս Բախշիյանի դեմ մեղադրանքը, անխոս, շինծու է, և հենց այդ անհեթեթությամբ էլ տրամաբանական։ Իշխանափոխությունից հետո դատական համակարգն այն եզակի կայացած կառույցն էր, որ ամբողջությամբ ծնկի չիջավ «հեղափոխական» վարչախմբի առջև։ Բազմաթիվ դեպքերով դատավորները անկախ և անաչառ որոշումներ են կայացրել, հրաժարվել են կատարել Փաշինյանի քմահաճույքները։
Որոշ ժամանակ գործող վարչախումբը դատավորների այս անկախությունը ներկայացնում էր որպես իր ժողովրդավարության օրինակ, իշխանության թևերի փոխզսպումների և հակակշիռների ցայտուն դրսևորում։ Վերլուծաբանները, սակայն, կանխատեսում էին, որ այս իրավիճակը երկար ձգվել չի կարող։ Երբ երկիրը գլորվում է բռնապետության անդունդը, որևէ անկախ համակարգ գոյություն ունենալու իրավունք չունի։ Ուստի և, անհեթեթության այս դրսևորումը միանգամայն պատճառաբանված է Փաշինյանի տեսակետից։ Նա պարզ ազդակ է հղել դատական ողջ համակարգին, որ կհետապնդի ու կհալածի յուրաքանչյուրին, ով նույնիսկ կմտածի դատական անկախության մասին։ Իսկ գագիկջհանգիրյաններն ու կարենանդրեասյանները կապահովեն դատական համակարգի ջախջախումը։
Արմեն Հովսեփյան
