Տիգրան Ավինյանը վերցրեց Երևանի քաղաքապետարանը
Քաղաքականություն
Նախկին փոխվարչապետ Տիգրան Ավինյանը վերցրեց Երևանի քաղաքապետարանը, իսկ տակավին մեկուկես ամիս առաջ նշանակված քաղաքապետ Հրաչյա Սարգսյանն ընդամենը որպես դեկորացիա է աշխատելու Ավինյանի մոտ։ Երևանի ավագանին երեկ քվեարկությամբ նշանակեց երեք փոխքաղաքապետերի։ Առողջապահության նախկին փոխնախարար Գևորգ Սիմոնյանը կհամակարգի Երևանի քաղաքապետարանի առողջապահության, սպորտի և երիտասարդության ոլորտները, արդարադատության նախկին փոխնախարար Սուրեն Գրիգորյանն՝ առևտրի, գովազդի և իրավական, իսկ «Ճանապարհային դեպարտամենտ» հիմնադրամի նախկին տնօրեն Ստեփան Մաչյանին վստահվել է ճարտարապետության և քաղաքաշինության ոլորտների ղեկավարումը։
Դեկտեմբերին քաղաքապետի առաջին տեղակալ նշանակված Լևոն Հովհաննիսյանն էլ երեկ ֆեյսբուքյան իր էջում է հայտնել, որ Երևանի քաղաքապետի որոշմամբ, որպես քաղաքապետի առաջին տեղակալ այսուհետ համակարգելու է Երևան քաղաքի ֆինանսական, կրթության, մշակույթի և տուրիզմի ոլորտները։ Քաղաքապետի ևս մեկ տեղակալի պաշտոն առայժմ թափուր է։ ԶԼՄ-ները գրում էին, թե այդ պաշտոնին նշանակվելու է ինքը՝ Տիգրան Ավինյանը, սակայն մինչ այս պահը որևէ նշանակում չի արվել։
Երևանի քաղաքապետի պաշտոնում, մեր տեղեկություններով, տևական ժամանակ քննարկվում էին Տիգրան Ավինյանի և իշխանական օլիգարխ Խաչատուր Սուքիասյանի թեկնածությունները։ «Քաղաքացիական պայմանագիր» կուսակցության վարչությունը բուռն քննարկումների արդյունքում որոշել է, որ այդ պաշտոնին ավելի համապատասխանում է Ավինյանը։ Հայկ Մարությանի պաշտոնանկությունից հետո իշխող ուժը խնդիր ուներ կա՛մ անհապաղ արտահերթ ընտրություններ նշանակել, ինչը լուրջ խնդիրներ կարող էր հարուցել՝ հաշվի առնելով Երևանում փաշինյանական վարչախմբի ցածր վարկանիշը, կա՛մ էլ ժամանակավոր քաղաքապետ նշանակել, մինչև պատրաստ լինեն ատահերթ կամ հերթական ընտրութունների։
Հերթական ընտրությունները, նշենք, կայանալու են 2023 թվականի աշնանը։ Արդյունքում որոշվեց սպասել, մեկտեղել ռեսուրսները, պատրաստվել ընտրությունների։ Իսկ քաղաքապետարանում այլևս ավինյանական կադրերն են որոշումները կայացնելու։ Թե՛ Լևոն Հովհաննիսյանը, թե՛ նորանշանակ երեք փոխքաղաքապետերը Ավինյանի կադրերն են, որքան էլ Հրաչյա Սարգսյանը դիֆերամբներ ձոնի, հայտարարի, թե բովանդակային թիմ է ձևավորվում։ Նոր փոխքաղաքապետերին հանձնարարվել է կադրային հարցերը լուծել, նշանակումներ անել վարչության ղեկավար կազմերում, մանրամասն հետազոտել վարչական շրջանների ղեկավարների աշխատանքը, ազատվել անցանկալի տարրերից։ Հրաչյա Սարգսյանին դեռ որևէ խոստում չեն տվել, նա, Երևանի քաղաքապետի պաշտոնն ազատելուց հետո, որևէ այլ պաշտոնի կնշանակվի, եթե արդարացնի Տիգրան Ավինյանի հույսերը։
Արամ Պետրոսյան
