Տիգրան Ավինյանը կդառնա Երևանի «ստվերային» քաղաքապետ
Քաղաքականություն
Հայաստանի նախկին փոխվարչապետ Տիգրան Ավինյանն առաջիկայում նշանակվելու է Երևանի փոխքաղաքապետ։ Այդ նպատակով Ավինյանն ազատվելու է ԶՊՄԿ-ում ՀՀ կառավարության ներկայացուցչի պաշտոնից, և այդ կարգավիճակում նրան փոխարինելու է Սյունիքի նախկին փոխմարզպետ Նարեկ Բաբայանը։ Վերջինս ազատման դիմում է ներկայացրել Սյունիքի մարզպետի տեղակալի պաշտոնից։ Ավինյանի՝ փոխքաղաքապետ նշանակվելու տեղեկությունը երեկ տարածել է Ավինյանի վերահսկողության տակ գտնվող «Radar Armenia» տելեգրամյան ալիքը, այսինքն, կասկած չի հարուցում նշանակման փաստը։
Այն, որ Ավինյանը նշանակվելու է փոխքաղաքապետ, մամուլում շրջանառվում էր շատ վաղուց, սակայն ավագանու վերջին նիստում փոխքաղաքապետեր նշանակվեցին միայն երեք անձինք՝ առողջապահության նախկին փոխնախարար Գևորգ Սիմոնյանը, արդարադատության նախկին փոխնախարար Սուրեն Գրիգորյանն ու «Ճանապարհային դեպարտամենտ» հիմնադրամի նախկին գործադիր տնօրեն Ստեփան Մաչյանը։ Երևանի քաղաքապետը նաև առաջին տեղակալ ունի՝ Լևոն Հովհաննիսյանը, ով օրենքի պահանջով նաև ավագանու անդամ է։ Ավինյանի նշանակումը հետաձգվեց, քանի որ լուրեր էին շրջանառվում, թե նախկին փոխվարչապետը չի ցանկանում նույնիսկ ժամանակավոր ավելի ցածր պաշտոն զբաղեցնել։
Ըստ ամենայնի, իշխող «Քաղաքացիական պայմանագրում» որոշել են Ավինյանին գործուղել քաղաքապետարան, որպեսզի նա անձամբ վերահսկի անգլիական թագուհու դերից դժգոհ Հրաչյա Սարգսյանի և ավագանու աշխատանքը։ Ավինյանի նշանակումը, ամենայն հավանականությամբ, տեղի կունենա մարտի սկզբին գումարվելիք հերթական նիստում, եթե մինչև այդ չորոշեն արտահերթ նիստ գումարել։ Նրա նշանակմամբ, Հրաչյա Սարգսյանն այլևս կզրկվի Երևանում որոշումներ կայացնելու հնարավորությունից։ Ներկայումս գործող չորս փոխքաղաքապետերն էլ նշանակվել են անձամբ Տիգրան Ավինյանի «դաբռո»-ով։ Նախկին փոխվարչապետին փոխքաղաքապետ նշանակելով, ապա և, հերթական կամ արտահերթ ընտրություններում որպես իշխանության քաղաքապետի թեկնածու կարգելով՝ Փաշինյանը հասկացնում է իր կուսակիցներին, որ այլ թեկնածություններ չի քննարկելու քաղաքապետի պաշտոնի համար։ Երևանը չափազանց կարևոր է, որպեսզի այն մեկ ուրիշ՝ իշխանական բուրգին ոչ այնքան նվիրված անձի նշանակեն։
Վարդան Մելիքյան
