Ադրբեջանը հետախուզում է հայտարարել նախկին նախագահների նկատմամբ, իսկ ՀՀ իշխանությունը լռում է
Քաղաքականություն
Ադրբեջանը հետախուզում է հայտարարել Հայաստանի նախկին նախագահներ Ռոբերտ Քոչարյանի և Սերժ Սարգսյանի նկատմամբ։ Ադրբեջանի զինդատախազության հատուկ հետաքննությունների բաժնի պետ Էմիլ Թաղիևը հայտարարել է, թե Հայաստանի նախկին նախագահներ Ռոբերտ Քոչարյանը և Սերժ Սարգսյանը քրեական օրենսգրքի համապատասխան հոդվածներով քրեական պատասխանատվության են ենթարկվել, նրանց նկատմամբ հետախուզում է հայտարարվել։ Ադրբեջանցի պաշտոնյան ակնհայտ կեղծ տեղեկություններ է տարածել՝ իբր Քոչարյանն ու Սարգսյանը տարիներ շարունակ կոչ են արել վտարել ադրբեջանցիներին Արցախից, հրկիզել նրանց տները։
Այն, որ Ադրբեջանի իշխանությունները մինչ օրս վախեցած են նախկին նախագահներից, գաղտնիք չէ, Իլհամ Ալիևը 44-օրյա պատերազմից հետո պարբերաբար հիշատակել է Քոչարյանին և Սարգսյանին, տարփողել, թե ինքը հաղթել է ոչ թե Նիկոլ Փաշինյանին, այլ նախկին նախագահներին։
ՀՀ նախկին նախագահների դեմ հետախուզում հայտարարելը պետք է գործող իշխանությունների համար հրաշալի առիթ դառնար սեփական դեմքը փրկելու։ Փաշինյանական վարչակազմը, անկախ նախկինների հետ իր ունեցած տարաձայնություններից, կարող էր իր ձայնը բարձրացնել նման որոշման դեմ, պաշտպաներ ՀՀ պետական շահն ու պետական հաստատությունների հեղինակությունը։ Մինչդեռ գործող իշխանությունները բառ անգամ չեն արտաբերել այդ կապակցությամբ։ Միգուցե, նրանք էլ են շահագրգիռ, որ Ադրբեջանը հետախուզում հայտարարի Ռոբերտ Քոչարյանի և Սերժ Սարգսյանի նկատմամբ։ Ի՞նչ է սա, եթե ոչ պարզ մանրախնդրություն։
«Հատկանշական է, որ ՀՀ երկրորդ նախագահ Ռոբերտ Քոչարյանի և ՀՀ երրորդ նախագահ Սերժ Սարգսյանի նկատմամբ երկրի ներսում հետապնդում են իրականացնում կապիտուլյանտ իշխանությունները, իսկ երկրից դուրս նրանց փորձում է հետապնդել կապիտուլյանտ իշխանությունների փաստացի դաշնակիցը դարձած ադրբեջանական իշխող կլանը: Ո՛չ Հայաստանի ներսում գործող վարչակազմի կողմից, և ո՛չ էլ Հայաստանից դուրս նրան հետապնդողներին չի՛ հաջողվելու կանգնեցնել Սերժ Սարգսյանին իր առաքելությունն իրականացնելու ճանապարհին»,- ասվում է երրորդ նախագահի գրասենյակի կողմից տարածված հայտարարության մեջ։ Երբ ավելացնելու ոչինչ չկա։
Վահագն Սերոբյան
