Հայաստանն այսօրվանից նոր օմբուդսմեն ունի
Քաղաքականություն
Հայաստանն այսօրվանից նոր օմբուդսմեն ունի․ ՀՀ մարդու իրավունքների պաշտպան Արման Թաթոյանն այսօր ավարտում է իր վեցամյա առաքելությունը՝ պաշտոնն ու գրասենյակը փոխանցելով նոր օմբուդսմենին։ Արման Թաթոյանն, ի դեպ, ՀՀ չորս օմբուդսմեններից միակն էր, ով պաշտոնավարել է ամբողջ ժամկետով։ Այսօրվանից այդ պաշտոնը կզբաղեցնի արդարադատության նախկին փոխնախարար Քրիստինե Գրիգորյանը, ով գործող վարչախմբի ներկայացրած թեկնածուն է, ուստի և պաշտպանելու է ոչ թե շարքային քաղաքացիների, Ադրբեջանի վայրագություններից տուժածների, իշխանության կողմից հետապնդվողների, այլ միայն ու բացառապես Նիկոլ Փաշինյանի շահերը:
Թաթոյանն այսօր մամուլի ասուլիս է տվել, թվային տվյալներ ներկայացրել ՄԻՊ գործունեության վերաբերյալ։ Վերջին յոթ տարում, նշենք, եռակի ավելացել են ՄԻՊ գրասենյակից փոխանցված դիմում-բողոքները, իսկ թեժ գծին արված զանգերը՝ գրեթե յոթ անգամ։ Այս ամենը վկայում է, որ Թաթոյանին հաջողվել էր վստահելի օմբուդսմեն դառնալ հանրության աչքում։ Իսկ 44-օրյա պատերազմի ընթացքում և դրանից հետո նրա գործունեությունը լրջորեն խաթարել էին գործող վարչախմբի անդորրը։
Փաշինյանական պաշտոնյաները քանիցս Արման Թաթոյանին մեղադրել էին քաղաքական կողմնակալութան մեջ, երբ վերջինս ընդամենը պաշտպանել էր ադրբեջանցիների հարձակումներից տուժածներին, արձանագրել գործող իշխանության անգործությունը։ Վաղվանից այլևս Արման Թաթոյանը մասնավոր անձ է, ով կաշկանդված չի լինի պաշտոնի սահմանափակումներով։ Նա ինքը դեռ չի հայտնել, թե ինչ ծրագրեր ունի, սակայն կարելի է ակնկալել, որ կբացահայտի որոշ մանրամասներ, կներկայացնի փաշինյանական իշխանության ապօրինությունները։ Իսկ Հայաստանի Հանրապետությունը զրկվեց իր միակ արդյունավետ աշխատող պաշտոնյայից՝ փոխարենը ստանալով գորշ, անդեմ ու անհայտ մեկին, ում միակ արժանիքը բոլոր իշխանություններին անձնվիրաբար ծառայելն է եղել։
Նարեկ Հայրապետյան
