Հայաստանի դեմ «բարդ օպերացիան» բացել է Ռուսաստանի անկման կծիկը
Լուսանկարում ՌԴ ԶՈՒ գլխավոր շտաբի պետ Վալերի Գերասիմովն ու ՌԴ պաշտպանության նախարար Սերգեյ Կյուժուգեթ-օղլուն են, Պուտինի հետ խորհրդակցությանը, որի ժամանակ ՌԴ նախագահը նրանց հրամայեց մարտական բարձր պատրաստության բերել միջուկային զենքը։ Խոսակցություններ կան, որ Գերասիմովի ու Շոյգուի այլայլված դեմքերը վկայում են, որ նրանք այդ հրամանը ստացել են հենց հեռուստաեթերում եւ ընդունել այն, եւ Պուտինը այդպիսով նրանց դրել է փաստի առաջ։
Պուտինը գնում է մինչեւ վերջ, եւ նրա «աշխարհքաղաքական ռեւիզիան» Ուկրաինայով չի ավարտվելու։ Հերթում են Մոլդովան, Մերձբալթյան երկրները, Արեւելյան Եվրոպան։ Միջուկային սպառնալիքն էլ պարզապես շանտաժ չէ։ Պուտինի՝ այլ իրականության մեջ ընկնելու, հոգեկան ու այլ խնդիրների, անձնական տրավմայի մասին արդեն բացահայտ խոսում են ռուսական ու միջազգային պաշտոնական ատյաններից։ Դրան ավելանում է նաեւ այն հանգամանքը, որ արեւմտյան պատժամիջոցները փաստացի լուծարում են Ռուսաստանը որպես միջազգային քաղաքական-տնտեսական տարածքի պետություն։
Սպառնալիքի լրջությունը վկայում է ԱՄՆ նախագահ Բայդենի երեկվա ուղերձը։ Բայդենը հայտարարեց, որ ԱՄՆ-ն պաշտպանելու է ՆԱՏՕ-ի դաշնակիցների ամեն մի դյույմը, կրկնելով, որ Ուկրաինայում չեն կռվելու։ Կարծիք կա, որ դա քողարկված առաջարկ է ՌԴ-ին, կամ պայմանավորվածություն, որ Մոսկվան բավարարվի Ուկրաինայի մի մասով, սակայն դա ներկայում անիրական է թվում։
Ներկայում շատ է խոսվում Պուտինին կանգնեցնելու մասին, ընդ որում՝ մեղմ ասած հարկադրանքի մեթոդաբանությամբ։ Նշվում է, որ շատ բան կախված է ռուս զինվորականներից՝ հանցավոր հրամանները չկատարելու առումով։ Մյուս կողմից, խորհրդային-ռուսական զինվորականությունը ուսուցվում է քաղաքական ղեկավարության հրամանների անվերապահ կատարման եւ հնազանդության ոգով, իսկ Պուտինյան շրջանում բանակը ենթարկվել է նաեւ հատուկ ծառայությունների «լրացուցիչ մշակմանը»։
Կյուժուգեթ-օղլուն ու Գերասիմովը կբռնե՞ն Պուտինի ձեռքը։ Նրանց պլանավորմամբ եւ մասնակցությամբ Հայաստանի դեմ Արցախում «թուրքերի հետ համատեղ բարդ օպերացիայի իրականացումը» բացել է Ռուսաստանի անկման կծիկը։
