Ադրբեջանցիները առաջ են եկել Կապանի Ներքին Հանդ գյուղի ուղղությամբ և վրաններ տեղակայել․ նրանց դիտարկման տակ են գերեզմանոցը և ջրի աղբյուրը
Հասարակություն«Ադրբեջանցի զինվորականները առաջխաղացում են ունեցել Կապան խոշորացված համայնքի Ներքին Հանդ գյուղի շրջակայքում։ Այս մասին Tert.am–ին հայտնեց Կապան խոշորացված համայնքի Ներքին Հանդի վարչական ղեկավար Խաչատուր Բաղդասարյանը։
«Մոտ 10 օր առաջ են եկել, գյուղի գերեզմանոցից մոտ 1 կմ հեռավորության վրա վրաններ են խփել և արդեն քանի օր է այնտեղ են գտնվում։ Ներկա պահին 5 վրաններ կան տեղակայված»,– ասաց Բաղդասարյանը։
«Գյուղի ջրի աղբյուրը գտնվում է այդ հատվածում և իրենց մոտից դիտարկվում են թե՛ գյուղի գերեզմանոցը, թե՛ ջրի աղբյուրը։ Գյուղացիները թեև կարողանում են մոտ գնալ այդ հատվածներին, բայց վտանգավոր է։ Ճիշտ է` կրակոցներ կամ սադրանքեր չեն եղել, բայց ամեն դեպքում մոտ են գտնվում գյուղին»,– ընդծեց վարչական շրջանի ղեկավարը։
Վերջինս նշեց, որ դեպքի մասին տեղեկացրել են ռուս խաղաղապահներին, բայց առայժմ ոչ մի փոփոխություն չկա և տեղյակ չէ՝ ինչ են պամանավորվել։
Հարցին՝ որքան հեռավորության վրա են այս պահին ադրբեջանցիները գտնվում Ներքին Հանդ գյուղից, Խաչատուր Բաղդասարյանը՝ նշեց՝ մոտ 1․5 կմ։
