Լարված իրավիճակ Վարդենիսում
ՀասարակությունՎարդենիսում իրավիճակը լարված է, համայնքապետարանում ավագանու նիստ է մեկնարկել, դրսում ոստիկանական ուժեր են կուտակվել։
Դեկտեմբերի 30-ին համայնքապետարանում տեղի ունեցավ ավագանու անդրանիկ նիստը, որի ժամանակ համայնքի ղեկավար ընտրվեց Ահարոն Խաչատրյանը, սակայն ավագանու ՔՊ-ական անդամները պնդում էին, որ այդ նիստը տեղի է ունեցել օրենքի խախտումով, քանի որ իրենք տեղեկացված չեն եղել նիստի մասին, ուստի և Խաչատրյանին չեն ընդունում որպես համայնքապետ։
Հունվարի 4-ին համայնքապետի երդմնակալության արարողությունը տեղի ունեցավ դրսում՝ համայնքապետարանի շենքի դիմաց, քանի որ նախկին համայնքապետ, ՔՊ-ական Արամ Մելքոնյանը ոստիկաններին հանձնարարել էր ավագանու ընդդիմադիր անդամներին ներս չթողնել։
Հետո արդեն ավագանու ՔՊ խմբակցության անդամները դատարան հայց էին ներկայացրել՝ պահանջելով անվավեր ճանաչել ավագանու ընդդիմադիր անդամների անցկացրած անդրանիկ նիստը, որում համայնքի ղեկավար էր ընտրվել Խաչատրյանը։Դատարանը մասնակի բավարարել էր ՔՊ-ականների հայցը ու անվավեր ճանաչել որոշումը, որով համայնքի ղեկավար է ընտրվել Ահարոն Խաչատրյանը, այսինքն՝ պետք է տեղի ունենան համայնքապետի նոր ընտրություններ: Ընդդիմադիր երկու խմբակցությունները վստահ են, որ նոր ընտրություններում եւս իրենց թեկնածուն է ընտրվելու համայնքապետ։
