Արտակարգ իրավիճակ Լանջաղբյուրում
ՀասարակությունԳեղարքունիքի մարզի Լանջաղբյուր գյուղի միջնակարգ դպրոցի տնօրենի պաշտոնավարման ժամկետը լրացել է, դպրոցի աշխատակիցներից մեկը մեզ հետ զրույցում նշում է, որ երկու անգամ հայտարարվել է տնօրենի ժամանակավոր պաշտոնակատարի մրցույթ, սակայն երկու անգամն էլ մրցույթը ինչ-ինչ պատճառներով չի կայացել:
Մեր զրուցակցի պնդմամբ` տնօրենի ժամանակավոր պաշտոնակատար պետք է նշանակվեր կամ դպրոցի փոխտնօրեններից մեկը, որը խորհրդի անդամ չէ, կամ այլ անձ, ով ունի ավելի քան յոթ տարվա մանկավարժական փորձ, կամ էլ վերջին հինգ տարում կառավարման փորձ ունեցող մեկը, սակայն Գեղարքունիքի մարզպետարանից տնօրենի ԺՊ են նշանակել մի անձի, որն այս չափանիշներին չի համապատասխանում, ավելին` դպրոցի մանակավարժական կոլեկտիվը նրան չի ճանաչում և չի ընդունում:
Այն հարցին, թե ո՞վ է վերոնշյալ տնօրենի ԺՊ-ն և ի՞նչ կապ ունի Գեղարքունիքի մարզպետարանի հետ, մեր զրուցակիցը նշեց, որ հավանաբար ինչ-որ մեկի մտերիմն է: Լանջաղբյուրի միջնակարգ դպրոցում դասապրոցեսը կաթվածահար է եղել, աշակերտներն ու մանկավարժական կազմն իրենց բողոքի ձայնն են բարձրացնում: Նրանք չեն ուզում տնօրենի՝ իրենց անհայտ թեկնածուին հանդուրժել։
Մենք ժամեր շարունակ փորձում ենք կապ հաստատել նաև Գեղարքունիքի մարզպետարանի կրթության բաժնի վարիչի հետ, սակայն մեր զանգերը մնացին անպատասխան: Ընդունարանի աշխատակիցը խոստացավ, որ մեզ հետ կապ կհաստատեն, սակայն այդպես էլ որևէ մեկը չզանգահարեց ու այդպես էլ չկարողացանք պարզել, թե իրականում ով է Լանջաղբյուր գյուղի դպրոցի տնօրենի ժամանակավոր պաշտոնակատարը, որին նշանակելով փոթորկել են մի ամբողջ գյուղ եւ կաթվածահար արել դպրոցի աշխատանքները:
