Որն է Փաշինյան-Ալիև առաջիկա օրերի հանդիպման ամենամեծ վտանգը
ՀասարակությունԱմենամեծ խնդիրն այն է, որ Հայաստանը մինչև այդ հանդիպումը համաձայնություն է տվել Ադրբեջանի ներկայացրած այն 5 դրույթին, որոնք որևէ ձևով չեն շոշափում հայկական շահը, ապրիլի 6–ին կայանալիք Փաշինյան-Ալիև հանդիպմանն անդրադարձավ ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Պատգամավորն ընդգծեց՝ նույնիսկ այն դեպքերում, երբ հայկական կողմն ընդունում է ոչ շահեկան պահանջները, Ադրբեջանը շարունակում է ճնշումները նոր զիջումներ կորզելու համար։
«Դրանք արտահայտվում են ոչ միայն քաղաքական մակարդակում, այլ նաև կոնկրետ հողի վրա՝ ռազմական ագրեսիայի ձևով, որին մենք ականատես եղանք Արցախում։ Դեռ չեմ խոսում այն հումանիտար ճգնաժամի մասին, որն անընդհատ հրահրում է Ադրբեջանը գազի մատակարարումները խափանելու միջոցով», — ասաց նա։
Պատգամավորի խոսքով՝ Հայաստանի իշխանություններն այս դեպքում անգամ պատրաստակամ են ընդունել ադրբեջանական առաջարկները, այնինչ դրանք իրականում ոչ թե խաղաղություն են բերում, այլ՝ երկարաժամկետ կտրվածքով պատերազմ։
«Բայց նույնիսկ սա Ադրբեջանին չի բավարարում, և նա փորձում է հավելյալ ճնշումների միջոցով ստանալ իր համար նոր, ավելի շահեկան պայմաններ, ինչը, բնականաբար, որևէ ձևով չի կարող շոշափել Հայաստանի և Արցախի շահերը, և ապրիլի 6-ին նախատեսված այդ հանդիպման ամենամեծ վտանգը և սպառնալիքը պետք է փնտրել այդտեղ», — ասաց Տիգրան Աբրահամյանը։
