Հայաստանում նոր վարակի բռնկում կա. համաճարակաբան

Հայաստանում անցած մեկ ամսվա ընթացքում՝ մինչ այս պահը, գրանցվել է ջրծաղիկի շուրջ 2000 դեպք: Հիվանդությամբ վարակված անձանցից 88,2 տոկոսը կազմում են 0-18 տարեկանները, որից 40 տոկոսը՝ 3-6 տարեկանները: Չնայած կա ջրծաղիկ հիվանդության ակտիվացում, սակայն գրանցվող դեպքերը չեն հատում վարակի սեզոնայնությանը բնորոշ շեմը և անհանգստացնող ցուցանիշներ չեն: ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոնի (ՀՎԿԱԿ) վարակիչ և ոչ վարակիչ հիվանդությունների համաճարակաբանության վարչության համաճարակաբան Եվգենյա Խաչատրյանը «Հայկական ժամանակի» հետ զրույցում նկատում է՝ ջրծաղիկը ակտիվանում է ձմեռ-գարուն ժամանակահատվածում:

«Նախորդ երկու տարվա համեմատ ունենք վարակի դեպքերի գրանցման աճ, սակայն այդ տարիներին, պայմանավորված համավարակային սահմանափակումներով, որի հետևանքով շատ չէր մարդկանց շփումը միմյանց հետ, հիվանդությունը չէր տարածվում: Վերլուծության տվյալների համաձայն՝ այժմ շատ են դեպքերը Երևան քաղաքում, Սյունիքի և Լոռու մարզերում: Այսինքն՝ քաղաքներում են գրանցվում շատ դեպքերը, քանի որ մարդկանց սերտ շփման համար քաղաքային պայմանները նպաստավոր են»,- ասում է Խաչատրյանը՝ նշելով, որ այս պահին չի կարող տրամադրել նախորդ երկու տարիներին ջրծաղիկ հիվանդության արձանագրված դեպքերը: Ջրծաղիկը մեծ մասամբ գրանցվում է դպրոցահասակ և մանկապարտեզային տարիքի երեխաների շրջանում: Համաճարակաբանի խոսքով՝ այժմ վարակի դեպքերի աճը կարող է պայմանավորված լինել նաև հիվանդության պարբերականությամբ. «Եթե 2018-ի հետ համեմատենք, ապա կարող ենք ասել, որ հիվանդության աճ չունենք: Իսկ այս տարի դեպքերի աճը կարող է պայմանավորված լինել վարակի պարբերականությամբ. այն 3-4 տարի պարբերականությամբ աճ է գրանցում, հետո՝ մի քանի տարի նույն շեմի վրա մնում»: Հիվանդության գաղտնի շեմը տևում է 21 օր: Այն վարակիչ վիրուսային հիվանդություն է, որը փոխանցվում է մարդուց մարդուն:

Ունի 99 տոկոս վարակելիություն: Անձը, գտնվելով փակ տարածքում ջրծաղիկով վարակված մեկ այլ անձի հետ, ամենայն հավանականությամբ կարող է վարակվել հիվանդությամբ, եթե մինչ այդ վարակված և առողջացած չի եղել: Այսինքն՝ եթե երեխան հիվանդանում է, որպես կանոն, համաձայն գրականության, նա ցմահ իմունիտետ է ձեռք բերում, և երկրորդ անգամ չի կրկնվում հիվանդությունը: ՀՎԿԱԿ-ի մասնագետը շեշտում է՝ ջրծաղիկ հիվանդության դեպքում ինքնաբուժությամբ զբաղվելը կարող է բարդ հետևանքներ ունենալ:

«Վարակված անձի լորձաթաղանթի կամ մաշկի վրա առաջանում են թափանցիկ բշտիկներ: Վերջինս ունենում է տենդ, թուլություն, կարող են լինել նաև հազ, հարբուխ: Խոցելի խմբեր կան յուրաքանչյուր հիվանդության ժամանակ: Այս դեպքում էլ դրանք հղիները, քրոնիկ հիվանդություն ունեցողներն են: Եթե հղիները վարակվում են հիվանդությամբ, ապա մենք նրանց վերաբերյալ տեղեկատվություն ենք տրամադրում ՀՀ առողջապահության նախարարության Մոր և մանկան առողջապահության վարչություն, որպեսզի նրանց նկատմամբ ուշադրությունն ավելի խիստ լինի: Ընդհանրապես սա մանկական հիվանդություն է, սակայն կարող են բարձր տարիքի անձինք էլ վարակվել, և հիվանդությունը նրանց շրջանում ևս բարդ ընթացք ունենա»,- ասում է Խաչատրյանը: Երեխայի մաշկի կամ լորձաթաղանթներում որևէ փոփոխություն նկատելու դեպքում ծնողը պետք է դիմի բժշկի օգնության, և ջրծաղիկ հիվանդության հաստատման դեպքում երեխան պետք է ստանա համապատասխան բուժում: Ինքնաբուժության պայմաններում ջրծաղկի բշտիկները կթարախակալեն, և կառաջանա հավելյալ բարդություն, օրինակ՝ ականջի բորբոքում, թոքաբորբ:

Ջրծաղիկը սուր վարակիչ հիվանդություն է, փոխանցվում է օդակաթիլային ճանապարհով, բնութագրվում տենդով և մաշկի ու լորձաթաղանթների վրա փոքր, թափանցիկ պարունակությամբ բշտիկների առաջացումով: Այն վարակիչ է՝ սկսած հիվանդության թաքնված շրջանի վերջին 2 օրվանից, մինչև վերջին ցանային էլեմենտի ի հայտ գալու 5-րդ օրը: Ցանի կեղևակալման շրջանում հիվանդն այլևս վարակիչ չէ: Նշենք նաև, որ ջրծաղիկի դեմ պատվաստումները ներդրված չեն Հայաստանի պատվաստումների ազգային օրացույցում: