Արտակարգ դեպք Երևանում. երիտասարդ ոստիկաններն ու բժիշկը, վտանգելով իրենց կյանքը, Հաղթանակ կամրջից նետված մոտ 25-ամյա աղջկան դուրս են բերել ձորից և տեղափոխել հիվանդանոց
Հասարակություն
Այսօր՝ հուլիսի 29-ին, արտակարգ դեպք է տեղի ունեցել Երևանում։ Ժամը 12։10-ի սահմաններում մոտ 25 տարեկան աղջիկը Հաղթանակ կամրջից ինքնասպանություն գործելու նպատակով իրեն ցած է նետել։
Ինչպես դեպքի վայրից հայտնում է ֆոտոլրագրող Գագիկ Շամշյանը, այդ պահին նշած վայրում ծառայություն կատարող ՀՀ ոստիկանության պետական պահպանության գլխավոր վարչության Կենտրոնի պահպանության բաժնի ոստիկաններ, ոստիկանության ավագներ Սարգիս Հովհաննիսյանն ու Անդրանիկ Ավետիսյանը, այնուհետև օպերատիվորեն դեպքի վայր ժամանած Երևանի 1-03 շտապօգության 07 բժիշկների հերթապահ խմբի բժիշկ Գևորգ Մարտիրոսյանը, մեծ դժվարությամբ հաղթահարելով հսկայական քարերն ու ջուրը, պատգարակով այդ աղջկան մոտեցրել են շտապօգնության ավտոմեքենային, որտեղ բժիշկ Գ. Մարտիրոսյանն իր գործընկերոջ հետ տեղում առաջին բուժօգնությունն է ցուցաբերել, ապա տեղափոխել են «Արմենիա» բժշկական կենտրոն։
Դեպքի մասին տեղեկությունը փոխանցվել է ոստիկանության կենտոնական բաժին, որտեղ փաստի առթիվ նյութեր են նախապատրաստվում։
Ոստիկանությունը պարզում է հիվանդանոց տեղափոխվածի ինքնությունը։
Դեպքի վայրում հավաքված մի քանի քաղաքացիներ էլ, ովքեր հրաժարվեցին տեսախցիկի առջև խոսել, ասում էին. «Վայրկյաններ տևեց, երբ այդ աղջիկն իրեն կամջից նետեց, ու տեսանք, թե ինչպես 2 երիտասարդ ոստիկան ու բժիշկ ոնց էին վազելով իջնում ձորը, թե էդ քարերի վրով ոնց անցան, երևի մենակ իրանք գիտեն, ոի էդ աղջկան մի կերպ ձորից դուրս բերեցին։ Շտապօգնության ավտոմեքենայի մեջ էլ բժիշկները օգնություն ցուցաբերեցին ու տեղափոխեցին հիվադաննոց։ Հալալ էր թե էդ ջահել ոստիկաններին, թե բժշկին»։
