«…Ես իմ 4 զավակների ապագան տեսնում եմ Բյուրեղավանում. մենք պայքարելու ենք, որպեսզի համայնքի բոլոր բնակիչները մնան և արարեն իրենց բնակավայրերում»
Հասարակություն
Հարցազրույց Կոտայքի մարզի Բյուրեղավան համայնքի ավագանու ընտրությունների «Քաղաքացիական պայմանագիր» կուսակցության ցուցակը գլխավորող Վլադիմիր Վարդևանյանի հետ:
- Պարոն Վարդևանյան, հայտ եք ներկայացրել, ինչպես ասում են, քաղաքականությամբ զբաղվելու, մասնավորաբար՝ որպես ՔՊ կուսակցության թեկնածու մասնակցում եք Բյուրեղավան խոշորացվածհամայնքի ավագանու ընտրություններին։ Ինչո՞վ է պայմանավորված այս որոշումը։
- Ինչպես գիտեք, ընտրությունները տեղի են ունենում Բյուրեղավան խոշորացված համայնքի 3 բնակավայրերում՝ Բյուրեղավանում, Նուռնուսում և Ջրաբերում: ՏԻՄ ընտրություններին իմ մասնակցությունը պայմանավորված է նախ և առաջ համայնքում տարիներով կուտակված խնդիրներին լուծում տալու և Բյուրեղավան խոշորացված համայնքում փոփոխություններ բերելու վճռականությամբ: Իհարկե, նաև պետք է ընդգծեմ մեր քաղաքական թիմի դերը իմ թեկնածությունը համայնքի ղեկավարի պաշտոնում առաջադրելու և պաշտպանելու համար, որը ինձ համար մեծ պատիվ և պատասխանատվություն է, ինչի համար հայտնում եմ իմ շնորհակալությունը:
- Քարոզարշավն արդեն իսկ մեկնարկել է, հանդիպումներ եք ունենում բնակիչների հետ։ Ի՞նչ հիմնական խնդիրներ են վերջիններս վեր հանում։
- Վերջին շուրջ 14 տարում Բյուրեղավան համայնքում քաղաքային իշխանության փոփոխություն տեղի չի ունեցել: Նաև պետք է ընդգծեմ, որ համայնքային խնդիրներին այս տարիների ընթացքում ոչ միայն լուծումներ չեն տրվել, այլ նաև շատ հիմնախնդիրներ արդեն լուրջ մարտահրավեր են դարձել համայնքի կենսագործունեության համար: Մասնավորապես, այս պահին համայնքն ունի խմելու ջրի մատակարարման լուրջ հիմնախնդիր, որի հետ կապված մենք ունենք մեր կոնկրետ լուծումները, և 21-րդ դարում մեր համայնքի քաղաքացիները պետք է ունենան տարրական կենցաղային պայմաններ ապրելու համար: Անմխիթար վիճակում է համայնքի բնակֆոնդը՝ մուտքեր, վերելակներ, տանիքներ: Բակերը չունեն պատշաճ պայմաններ մարդկանց ու հատկապես երեխաների առօրյան կազմակերպելու համար: Աղբահանությունը կազմակերպվում է ոչ պատշաճ. քաղաքի տարբեր հատվածներում կարող ենք ականատես լինել աղբի կուտակումների: Բյուրեղավան քաղաքում ունենք 3 հանրակացարան, որտեղ մարդկանց կենսապայմանները բնավ չեն համապատասխանում 21-րդ դարի չափանիշներին: Այս խնդրին պետք է վերջնական լուծում տրվի, որի շուրջ մենք ունենք կոնկրետ պատկերացումներ: Քաղաքում մեծ թվով երեխաներ հաճախում են սպորտդպրոց, որտեղ նույնպես ունենք մատուցվող անհրաժեշտ պայմանների բացակայություն: Համայնքի համար Առաջին՝ Հայրենադարձների թաղամասը ունի ճանապարհային խնդիր. հետիոտների համար նախատեսված ճանապարհը անմխիթար վիճակում է, և բացակայում է լուսավորությունը: Նուռնուս և Ջրաբեր համայնքներում կա հանրային տրանսպորտի և կրկին ջրամատակարարման խնդիր: Իսկ այն տեսանելի աշխատանքները, որոնք իրականացվել են համայնքում, հիմնականում կատարվել են 2018 թ.-ից հետո՝ կառավարության սուբվենցիոն ծրագրերի շրջանակներում:
- Ինչպե՞ս եք պատկերացնում այս բոլոր խնդիրների լուծումը, հատկապես ֆինանսական տեսանկյունից, քանի որ գիտենք՝ համայնքային բյուջեները բավականին սուղ են։
- Ես չեմ կարծում, որ համայնքային բյուջեները սուղ են, մյուս կողմից էլ կա նաև առկա միջոցների արդյունավետ օգտագործման խնդիր: Առկա են շատ կարևոր ծրագրեր իրականացնելու արտաբյուջետային, այդ թվում` միջազգային դոնոր կազմակերպությունների աջակցությամբ դրանք կյանքի կոչելու լուրջ հնարավորություններ: Հետևաբար, համադրելով այս ամենը՝ կարող ենք փաստել, որ մենք ունենք ոչ թե ռեսուրսների, այլ դրանց պատշաճ տնօրինման և կառավարման խնդիր:
- Դուք բավականին երիտասարդ եք, և արդեն բազմազավակ հայր եք` ունեք 4 երեխա: Ինչպե՞ս եք պատկերացնում երիտասարդ ընտանիքների հիմնախնդիրների լուծումը համայնքում:
- Շատ կարևոր հարց եք բարձրացնում: Ցավոք սրտի, շատ երիտասարդ ընտանիքներ այսօր, ապագա չտեսնելով մեր համայնքում, արտագաղթում են կամ մայրաքաղաք, կամ ընդհանրապես լքում են հայրենիքը: Սա ցավալի իրավիճակ է, որի հետ մենք չենք համակերպվելու: Ես իմ 4 զավակների ապագան տեսնում եմ Բյուրեղավանում և մեր պայքարի նպատակը հենց այնպիսի փոփոխություններ բերելն է, որ բյուրեղավանցիները, նուռնուսցիները, ջրաբերցիները մնան, աշխատեն, արարեն հենց իրենց համայնքում: Մենք ունենք շատ կարևոր ծրագիր՝ երիտասարդ ընտանիքների բնակարանային հիմնախնդիրները լուծելու համար, և մենք նախանձախնդիր ենք նշածս բոլոր հիմնախնդիրներին լուծում տալու հարցում:
- Եվ վերջում՝ ինչո՞ւ քաղաքացին պետք է իր քվեն հենց ձեզ և ձեր քաղաքական թիմին վստահի։
- Ես արդեն նշեցի շատ հիմնախնդիրներ և դրանց լուծման մեր տեսլականը: Մենք գալիս ենք վճռական փոփոխություններ բերելու՝ թիմային ամենօրյա աշխատանքով: Այսօր համայնքային կյանքը գտնվում է լճացած վիճակում, մենք կանգնած ենք երկընտրանքի առաջ՝ կամ համակերպվել այս իրավիճակին, կամ գնալ փոփոխությունների: Համոզված եմ՝ համայնքը ընտրելու է երկար սպասված փոփոխության ճանապարհը:
