Գիտնականները հայտնաբերել են կորոնավիրուսի հիմնական խոցելիությունը
ՀասարակությունԱմերիկացի գիտնականները հայտնաբերել են կորոնավիրուսի հիմնական խոցելիությունը, ինչը թույլ կտա նրա վրա ազդել գոյություն ունեցող դեղամիջոցների օգնությամբ: Ստացված արդյունքները Չիկագոյի համալսարանին կից Փրիթցքերի անվան մոլեկուլյար ինժեներիայի դպրոցի հետազոտողները հրապարակել են Science Advances ամսագրում։
Ինչպես նշում են հոդվածի հեղինակները, «դեղամիջոցների համար առավել գրավիչ թիրախը» Mpro պրոտեազան է (վիրուսի վերարտադրման մեխանիզմին մասնակցող ֆերմենտ): Ավելի վաղ բժիշկներն արդեն փորձել էին ազդել նրա կառուցվածքի վրա եւ դրա օգնությամբ պարզել նոր կորոնավիրուսի եւ SARS-CoV-ի միջեւ եղած տարբերությունները, հայտնում է «ՌԻԱ Նովոստի»-ն:
Ամերիկացի մասնագետներին հաջողվել է գտնել նախկինում չբացահայտված սպիտակուցային կապ, որը կարող է կորոնավիրուսի վարակի բուժման նոր ռազմավարությունների մշակման բանալին դառնալ:
Այսպես, նրանք պարզել են, որ պրոտեազայի վրա ազդող առավել արդյունավետ միացություններից մեկը` էբսելենը, դեղամիջոցային մոլեկուլ է, որն ունի հակաբորբոքային եւ հակաօքսիդիչ հատկություններ: Հետազոտողների կարծիքով՝ այս հայտնագործությունը ցույց է տալիս COVID-19-ի բուժման առկա ռազմավարությունները վերանայելու անհրաժեշտությունը:
Վերջին տվյալներով՝ ամբողջ աշխարհում կորոնավիրուսով վարակվածների թիվը մոտենում է 22 միլիոնին, նրանցից 766 հազարը մահացել է: Անցյալ շաբաթ Ռուսաստանը գրանցել է աշխարհում առաջին կորոնավիրուսի պատվաստանյութը, որը ստեղծվել է Գամալեիի անվան կենտրոնում:
