Նոր հերոսներ, զարգացումներ և մանրամասներ. ինչպես են անցնում «Դեպի ճամբար»- ի նկարահանումները (լուսանկարներ)
ԱպրելակերպԱրդեն օրեր շարունակ Բջնիում իրականացվում են «Դեպի ճամբար» հեռուստասերիալի 4-րդ եթերաշրջանի նկարահանումները, իսկ դերասանական և աշխատանքային անձնակազմը բաղկացած է շուրջ 100 հոգուց, որոնք նաև ապրում են Բջնիում: Tert.am Life-ը ուղևորվել է Բջնի՝ ներկա գտնվելով նկարահանումներին և ներկայացնում է նոր հերոսներին, բացահայտում այս եթերաշրջանի զարգացումները՝ ներկայացնելով ֆոտոշարք:
Նախագծի սցենարիստ Գրիգոր Դանիելյանը հենց «ճամբարի սրտում» ներկայացրեց մեզ նոր եթերաշրջանի մանրամասները և ընդգծեց նման նախագծի կարևորությունը, որ երեխաների, դպրոցականների համար պետք է լինի նման նախագիծ:
Մեզ հետ զրույցում նա նշեց, որ չէր ցանկանում նկարահանվել այս եթերաշրջանում:
«Ես գիտակցում եմ, որ ամեն բան հավերժ չէ և գալիս է փուլ, երբ պետք է լինի սերնդափոխություն: Մենք ներգրավվել ենք նոր դերասանների, փոխվել են ջոկատավարները, որոնք նախկինում մարմնավորում էին ճամբարականների: Մի փոքր բարդ աշխատանք է տարվում սցենարական առումով, քանի որ այստեղ մենք գործ ունենք դերասանական մեծ անձնակազմի հետ, որոնք երեխաներ են: Ես և Գարիկ Սեփխանյանը ժամեր շարունակ նստում ենք սենյակում՝ զբաղվելով սցենարական աշխատանքով»,- նշեց Գրիգոր Դանիելյանը:
Ինչպես նշեցինք նկարահանման հրապարակում երեխաներ են, որոնք նաև Գրիգոր Դանիելյանի և Հռիփսիմե Ելինյանի ստուդիայի սաներն են:
«Մենք ունենք երկար տարիների փորձ երեխաների հետ աշխատանքի հարցում, մենք այս անձնակազմի հետ նաև աշխատում ենք Երևանում և նրանք լավ գիտեն՝ ինչու են եկել, ինչ նպատակ ունենք և ինչպես պետք է իրենց պահեն: Մենք ապահովվում ենք իրենց անվտանգությունը, նրանք նկարահանվելուն զուգընթաց նաև այստեղ հանգստանում են: Կարևոր է, որ այն ամենն ինչ նրանք սովորում են ստուդիայում կարողանան կիրառել նկարահանման հրապարակում»,- ժպիտով պատասխանեց Գրիգոր Դանիելյանը:
Այս եթերաշջրանում մենք չենք տեսնելու նախորդ ջոկատավարներին, որոնց մարմնավորում էին Մարիամ Ալեքսանյանը, Եվա Զոհրաբյանը և Գոռ Հակոբյանը: Այս եթերաշրջանում ջոկատավարների դերում են երիտասարդ դերասաններ, որոնք նախկինում եղել են ճամբարականներ: 4 դերասանները՝ Հայկուհի Ղուլյանը,Լեո Հայրապետյանը, Գևորգ Մարգարյանը և Վերոնիկա Կիրակոսյանը մեծ ոգևորությամբ են մասնակցում նկարահանումների և ճամբարի գողտրիկ անկյունում նրանք պատրաստակամորեն պատմեցին իրենց հույզերի, ներքին կոնֆլիկտների և նկարահանումների մասին:
Դերասանները միահամուռ կերպով նշեցին, որ իրենք լիահույս են, որ այս եթերաշրջանում կլինեն ջոկատավարներ, չնայած թերահավատորեն էին մոտենում այդ ամենին:
«Գևորգի տատին միշտ ասում էր, որ սպասեք շուտով դուք եք լինելու ջոկատավարները, իսկ մենք չէինք հավատում, բայց եկավ պահն ու մենք ամենայն պատասխանատվությամբ ենք մոտենում նկարահանումներին, երեխաների հետ աշխատանքին: Մեր ռեժիսորն այս անգամ այլ մոտեցումներով է աշխատում և երկար տեսարաններ ենք ունենում առանց դադարների և սա հետաքրքիր փորձ է»,- ասաց Լեո Հայրապետյանը:
Հայկուհի Ղուլյանը քննաշրջանին զուգընթաց է մասնակցում նկարահանումներին և նշում է, որ դա խոչընդոտներ չի ստեղծում:
«Մենք աշխատում ենք մի միջավայրում, որտեղ բոլորը մեր ընտանիքի անդամներն են, որոնք կարևորում են մեր քաղաք գնալը և վերադարձը: Աշխատանքը շատ հետաքրքիր է և մենք լիովին այս գործընթացի մեջ ենք, քանի որ այստեղ, թե՛ ապրում ենք, թե՛ աշխատում և աննկարագրելի են հույզերը, երբ ռեժիսորը դրական գնահատական է տալիս՝ ոգեշնչելով մեզ»,- նշեց Հայկուհի Ղուլյանը:
Գևորգ Մարգարյանն անկեղծացավ՝ պատմելով ներքին միջավայրի և ընկերների արձագանքի մասին, երբ նրանք իմացան, որ այս տարի հենց այս 4 դերասաններն են լինելու ջոկատավարի դերում:
«Մենք ընկերներ ենք և սովորում ենք նույն ստուդիայում, մենք ինտենսիվ աշխատում ենք դասախոսների հետ, որոնք գիտեն մեր հնարավորությունները: Առաջին օրերի ընթացքում մտավախություններ ունեինք՝ ինչպես կընդունեն մեր կարգավիճակը, բայց ամեն բան հարթ էր: Հետաքրքիր է, որ հեռուստադիտողը տեսնում է մի ճամբարի մասին նախագիծ, բայց, քանի որ մենք ապրում ենք այստեղ մենք էլ մեր «սերիալն» ունենք իրական կյանքում և այս հույզերը մի տարի շարունակ պատմում ենք բոլորին»,- մանրամասնեց Գևորգ Մարգարյանը:
Վերոնիկա Կիրակոսյանը նշեց, որ դժվարությունները սիրով են հաղթահարում և հետագայում ամիսներ շարունակ հիշում հենց այս նկարահանումներն ու օրերը:
«Սենյակում ապրում ենք 8 աղջիկներով և դա մարտահրավեր է, քանի որ դասական աղջիկների կարգավիճակում ենք, երբ պետք է շուտ զարթնենք, պատրաստվենք: Այնուամենայնիվ այս ամենն իր հետաքրքրությունն ունի և տևական ժամանակ սպասում էինք նկարահանումների մեկնարկին»,- նշեց երիտասարդ դերասանուհին:
Այս տարի ֆիզղեկի դերը կերտելու է դերասան Արմեն Սողոյանը, որը հենց ֆուտբոլի դաշտում զրուցեց մեզ հետ՝ պատմելով իր կերպարի առանձնահատկությունների և երեխաների հետ աշխատանքի մասին:
«Շատ հետաքրքիր փորձ է, երբ աշխատում ես երեխաների հետ, քանի որ առօրյայում ևս ես մարզում եմ երեխաների, բայց այստեղ նկարահանումներ են և սերունդը լավն է, աշխատասեր, մենք լսում ենք և հասկանում միմյանք: Նախորդ եթերաշրջաններում ֆիզղեկի դերում էր Ռաֆայել Երանոսյանը, որն ուներ հումորային խառնվածք, բայց իմ կերտած կերպարի մեջ կա լրջություն»,- ասաց Արմեն Սողոյանը:
Ճամբարի գեղարվեստական ղեկավարի դերում է Աննա Մանուչարյանը, որը նկարահանվում է տևական դադարից հետո:
«Հետաքրքիր էր վերադառնալ եթեր և հենց այս միջավայր, որտեղ նախկինում աշխատել էի: Այս եթերաշրջանի ընթացքում մենք կտեսնենք այլ զարգացումներ, նոր գույներ, երկխոսություններ, քանի որ ֆիզղեկի դերում է Արմեն Սողոյանը և բնականաբար փոխվել են գեղարվեստական ղեկավարի և ֆիզղեկի հարաբերությունները»,- ասաց Աննա Մանուչարյանը:
Նոր հերոսներից մեկին էլ մարմնավորում է թատրոնի և կինոյի դերասանուհի Արաքսյա Մելիքյանը:
«Հետաքրքիր կերպար է իր խառնվածքով, մոտեցումներով և հետաքրքիր է նաև այս փորձը, երբ նկարահանումներն ամբողջությամբ իրականացվում են Բջնիում և այստեղ, թե՛ ապրում ենք, թե՛ աշխատում: Կերպարը նոր է և չեմ ցանկանում շատ փակագծեր բացել»,- եզրափակեց դերասանուհին:
Լուսանկարները՝ Վերոնիկա Բադալյան
