Տիգրան Ավինյանի սափրվելու իրական պատճառը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գաղտնիք չէ, որ նախահեղափոխական շրջանում ՔՊ-ական ակտիվիստ տղամարդիկ հիմնականում չէին սափրվում՝ սկսած Նիկոլ Փաշինյանից մինչև մանր ու միջին կալիբրի այլ ՔՊ-ականներ: Եվ պատճառն էլ հասկանալի է՝ նրանք ընդօրինակել էին Փաշինյանի իմիջը և մինչև այժմ չեն հրաժարվում հեղափոխության սիմվոլ դարձած մորուքներից:

Այդպիսին էր նաև նախկին փոխվարչապետ, այժմ Երևանի փոխքաղաքապետի պաշտոնը զբաղեցնող Տիգրան Ավինյանը, ով մինչ հեղափությունը մշտապես սափրված էր, ապա ընդօրինակեց Փաշինյանի ոճը, հիմա կրկին վերադարձել է նախկին տեսքին: Եվ ահա այստեղ է, որ հարց է առաջանում՝ ինչո՞ւ:

44-օրյա պատերազմից և Փաշինյանի կողմից կապիտուլյացիայի ակտը ստորագրելուց հետո Տիգրան Ավինյանը, ի տարբերություն շատ ՔՊ-ականների, ովքեր հրապարակային հայտնեցին իրենց աջակցությունը վարչապետին, ընդգծված դիստանցիա է պահում ՔՊ-ից և Փաշինյանից՝ ձգտելով մնալ երկրում ընթացող քաղաքական գործընթացների ստվերում: Նրանից մենք չենք լսում կտրուկ հայտարարություններ, նա չի հայտնվում թեժ բանավեճերի կիզակետում և որևէ գնահատական հնչեցնելիս էլ դա անում է անչափ հաշվարկված: ՔՊ-ից դիստանցիա պահելը արտահայտվեց նաև նրանով, որ Ավինյանը որոշում կայացրեց չընդգրկվել արտահերթ խորհրդարանական ընտրություններին «Քաղաքացիական պայմանագիր» կուսակցության համամասնական ցուցակում, ինչը բազմաթիվ քննարկումների տեղիք տվեց հանրության շրջանում և մեծ դժգոհություն առաջացրեց հենց ՔՊ-ականների մոտ, քանի որ այդ քայլը դիտվեց իբրև թիկունքից հարված թիմակիցներին:

Այժմ էլ Տիգրան Ավինյանը որոշել է այդ դիստանցիան պահել այլ, ավելի կրեատիվ ձևով՝ սափրվելով, ակնհայտ է, որ նա չի ցանկանում ասոցացվել ՔՊ-ի և Նիկոլ Փաշինյանի հետ, ում վարկանիշը, ըստ վերջին բոլոր սոց.հարցումների և չափումների, գահավիժել  է և հասել պատմական մինիմումի: Ավելին՝ Ավինյանը իրեն շրջապատում  է հիմնականում ոչ ՔՊ-ականներով՝ նաև այդպիսով ընդգծելով, որ ինքը առանձին խաղացող է: Բնականաբար, դա արտահայտվում է նաև որոշակի գործողություններով, որոնք ուղղակի կամ անուղղակի հաակսում են ՔՊ-ականների և անձամբ Նիկոլ Փաշինյանի վարած օրակարգին: Դիցուք՝ Ավինյանը, ի հեճուկս Փաշինյանի կողմից հնչեցրած դժգոհությունների, ոչ  միայն չդադարեցրեց «Նեմեսիս» գործողության մասնակիցների հուշարձանի կառուցումը, այլև դրա բացման ժամանակ ինքն իրեն գովազդեց և այնուհետև հրապարակայնորեն աջակցեց հուշարձանի գաղափարին: Կամ մեկ այլ օրինակ՝ Ավինյանի հայտնվելը պատարագի առաջին շարքում, մի դեպքում, երբ եկեղեցի-իշխանություններ հարաբերությունները բավական լարված են: 

Բնական է, որ  Նիկոլ Փաշինյանն սկսել է խիստ անվստահությամբ վերաբերվել Ավինյանին՝ հաշվի առնելով վերջինիս կողմից գրեթե չթաքցվող՝ ավելի բարձր քաղաքական հավակնությունները։ Գաղտնիք չէ, որ Տիգրան Ավինյանը համարվում է Արևմուտքի համար ընդունելի և պրո-արևմտյան դիրքորոշում ունեցող պաշտոնյա․ վերջինս հեղափոխությունից հետո և հատկապես փոխվարչապետ եղած ժամանակ բավական լոյալ էր վերաբերվում արևմտյան և հատկապես այսպես կոչված՝ «սորոսական» ՀԿ-ներին՝ նրանց արտոնություններ տրամադրելով և հարկերից ազատելով: Վերջինիս նշանակումը փոխքաղաքապետի պաշտոնում, շատերի կարծիքով, Փաշինյանի ռևերանսն էր Արևմուտքին, սակայն որոշակի ռիսկերով, քանի որ Ավինյանը մի շարք այլ ՔՊ-ականների շարքում դիտվում էր իբրև Նիկոլ Փաշինյանի հավանական իրավահաջորդ, իսկ քաղաքապետի պաշտոնում նա էլ ավելի անվերահսկելի կարող է դառնալ:

Այժմ, երբ Ավինյանը կրկին փորձում է դիրքավորվել իբրև առանձին խաղացող և դիստանցիա պահել ՔՊ-ից, պատահական չեն իշխանական և իշխանամերձ մամուլի կողմից նրան հասցվող հարվածները: Այնուհետև որպես առաջին նախազգուշական քայլ՝ կալանավորվեց Ավինյանի մտերիմներից համարվող Գևորգ Սիմոնյանը, ընդ որում, քրեական գործի շրջանակներում, որի ընդգրկման ժամանակահատվածում Երևանի փոխքաղաքապետը զբաղեցնում էր Պարետի պաշտոնը։ Հարուցված քրեական գործը կազմված է այնպես, որ ցանկացած պահի կարող է դրանում շրջանառվել նաև Տիգրան Ավինյանի անունը՝ որպես չարաշահումների օղակի կարևոր դերակատար։ Սակայն Փաշինյանը դեռևս չի գնում այդ քայլին՝ հասկանալով այն իմիջային վնասները, որոնք ընտրություններից առաջ կարող է կրել ՔՊ-ն՝ ընդհանրապես կորցնելով Երևանը «վերցնելու» շանսը։  Ավինյանի ինքնուրույնությունը կանխելու նպատակով Փաշինյանը ևս մեկ կարևոր որոշում է կայացրել, այն է՝ Երևանի ավագանու ընտրություններում ՔՊ նախընտրական շտաբը կղեկավարի ոչ թե Ավինյանի «մարդը», այլ վարչապետի ամենահավատարիմ և վստահելի թիմակիցներից մեկը՝ Արմեն Փամբուխչյանը:

Պատերազմից հետո տված իր ասուլիսներից մեկում Նիկոլ Փաշինյանը խոսեց այն սենյակների մասին, որտեղ իր դեմ են հանդես գալիս։ Նա նշեց, որ այդ սենյակները երեքն են, թեև չբացառեց, որ դրանց քանակն ավելի շատ կարող է լինել։ Ակնհայտ է, որ այդ սենյակներից առնվազն մեկում տեղակայված է Տիգրան Ավինյանի բևեռը, թևը և վերջինս չի էլ թաքցնում, որ ցանկանում է հանդես գալ իբրև առանձին ակտոր և վերջինիս սափրվելն ընդամենը այդ փաստը ապացուցող դրվագներից մեկն էր...