Հետաքրքրությունը մեր տարածաշրջանի նկատմամբ նվազում․ Փաշինյան
ՔաղաքականությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
«Ի՞նչ եք կարծում, տարածաշրջանային ավանդական միջնորդին՝ Ռուսաստանին, զայրացնում է այն փաստը, որ Արևմուտքը (խոսքը ԱՄՆ-ի և ԵՄ-ի մասին է) գնալով ավելի էական դեր է խաղում տարածաշրջանում։ Թե այն փաստը, որ Ռուսաստանը խճճվել է Ուկրաինայում, աշխատել է հօգուտ այլ խաղացողների, ովքեր այժմ նույնպես փորձում են օգնել ձեզ և ադրբեջանցիներին ընդհանուր լեզու գտնել»,– ՀՀ վարչապետ Նիկոլ Փաշինյանին նման հարց է տվել Euronews-ի միջազգային գլխավոր թղթակից Անելիզ Բորժեսը։
«Ուկրաինայի իրադարձությունների պատճառով ոչ միայն Ռուսաստանի, այլ նաև աշխարհաքաղաքական այլ խաղացողների հետաքրքրությունը մեր տարածաշրջանի նկատմամբ նվազում է, քանի որ գործնականում միջազգային ողջ ուշադրությունը կենտրոնացած է Ուկրաինայի վրա։ Սա գործոններից մեկն է»,– ի պատասխան լրագրողի հարցին՝ ասել է Նիկոլ Փաշինյանը։
Իր հերթին Ադրբեջանի նախագահ Իլհամ Ալիևը հիշեցրել է, որ Ռուսաստանն է եղել 2020 թվականի նոյեմբերի 10-ին հրադադարի համաձայնագրի կամ հռչակագրի ստորագրման միջնորդը։
«Դա ԱՄՆ-ն կամ Եվրամիությունը չէր: Իսկ հայ գործընկերոջս հետ մեր առաջին հանդիպումները կազմակերպել էր Ռուսաստանը՝ ռուսական տարածքում։ Ռուս-ուկրաինական պատերազմի բռնկումից հետո իրավիճակը փոխվել է, մենք տեսել ենք, որ ԱՄՆ-ն ու Եվրոպան ավելի ակտիվ են։ Իրականում մեզ համար էական տարբերություն չկա, թե ով է ղեկավարելու գործընթացը կամ, ասենք, ով է յուրացնելու միջնորդության դափնիները։ Կարևորը արդյունքի հասնելն է»,- նշել է նա:
Խոսելով ՌԴ–ի հետ հարաբերությունների մասին՝ Ալիևը հավելել է․ «Ինչ վերաբերում է Ադրբեջանի դիրքորոշմանը, ապա այստեղ քիչ բան է փոխվել, քանի որ մեր հարաբերությունները Ռուսաստանի հետ կմնան հավասարակշռված։ Դրանք հիմնված են միմյանց ազգային շահերի և, իհարկե, տարածքային ամբողջականության ու ինքնիշխանության ճանաչման վրա։ Ռուսաստանը մեր հարեւանն ու գործընկերն է»։
ՀՀ վարչապետը նաև անդրադարձել է Արցախում տիրող հումանիտար ճգնաժամին։
«Այն, ինչ կատարվում է Լեռնային Ղարաբաղում, հումանիտար ճգնաժամ է։ Ի՞նչ է հումանիտար ճգնաժամը: Լեռնային Ղարաբաղին սնունդ չի մատակարարվում, սննդամթերքը քիչ է։ Սննդամթերքի արտաքին մատակարարումները դադարեցվել են։ Մի շարք առաջին անհրաժեշտության ապրանքներ չեն մատակարարվում։ Մանկական սնունդ չի մատակարարվում, դեղեր չկան։ Հիգիենայի միջոցներ չկան։ Առաջին անհրաժեշտության այլ իրեր չկան։ Ադրբեջանը դադարեցրել է բնական գազի մատակարարումը Լեռնային Ղարաբաղ։ Ադրբեջանը դադարեցրել է էլեկտրաէներգիայի մատակարարումը Լեռնային Ղարաբաղ։ Վառելիքի մատակարարումները նույնպես դադարեցվել են Ադրբեջանի կողմից։ Ուրեմն սովի իրական վտանգ կա, մենք բախվում ենք նաև առողջական ոլորտում խնդիրների և այլն»։
Լրագրողի՝ «Բաքվում ասում են, որ Աղդամով երթուղին բաց է» դիտարկմանն ի պատասխան Փաշինյանը հիշեցրել է․ «Չգիտեմ, թե ինչ նկատի ունեք, քանի որ ես խոսում եմ մի հայտարարության մասին, որը ես ինքս եմ ստորագրել և որը միջազգային փաստաթղթի կարգավիճակ ունի։ Այնտեղ հստակ ասվում է, որ Լաչինի միջանցքը գտնվում է ռուս խաղաղապահների վերահսկողության տակ, և սա ոչ միայն ճանապարհ է, այլ 5 կմ լայնությամբ գոտի, որը պետք է դուրս լինի Ադրբեջանի վերահսկողությունից, հենց այս միջանցքը պետք է կապ ապահովի Լեռնային Ղարաբաղի և Հայաստանի միջև»,– ասել է նա։
