ՀՀ ՄԻՊ նախաձեռնությամբ քննարկվել են բռնի տեղահանված անձանց և փախստականների իրավունքների պաշտպանությանը վերաբերելի հարցեր

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մարդու իրավունքների պաշտպան Անահիտ Մանասյանի նախաձեռնությամբ այսօր՝ օգոստոսի 11-ին, տեղի է ունեցել քննարկում 1988-1992 թվականներին բռնագաղթած, ինչպես նաև 2020 թվականի 44-օրյա պատերազմի հետևանքով Լեռնային Ղարաբաղից բռնի տեղահանված անձանց իրավունքների պաշտպանության վերաբերյալ:

Հանդիպմանը մասնակցել են Ազգային ժողովի, Աշխատանքի և սոցիալական հարցերի, Արդարադատության, Կրթության, գիտության, մշակույթի և սպորտի ու Տարածքային կառավարման և ենթակառուցվածքների նախարարությունների, Ներքին գործերի նախարարության միգրացիայի և քաղաքացիության ծառայության, Անվտանգության խորհրդի գրասենյակի ներկայացուցիչներ:

Քննարկվել են նշված անձանց իրավունքների պաշտպանությանը վերաբերելի մի շարք հարցեր։

«Մեր նախորդ հանդիպման ժամանակ բարձրաձայնված խնդիրները հավաքագրվել են և ուղարկվել իրավասու մարմիններին՝ նպատակ ունենալով հնարավորինս արագ լուծում տալ դրանց։ Մեզ համար շատ կարևոր է լուծման ուղիներ գտնելը, քանի որ հիմքում մեր հայրենակիցների իրավունքների պաշտպանության հարցն է։ Այսօրվա հանդիպման նպատակը հենց սա է՝ հասցեավորել բոլոր խնդիրները և գնալ դրանց լուծման ճանապարհով»,- ասել է Անահիտ Մանասյանը։

Հանդիպմանը մասնակցել են նաև ներկայացուցիչներ բռնի տեղահանված անձանց խնդիրներով զբաղվող հասարակական կազմակերպություններից, որոնք իրենց հուզող հարցերը քննարկել են պետական մարմինների ներկայացուցիչների հետ։

Պաշտպան Անահիտ Մանասյանը նշել է, որ բռնի տեղահանված անձանց իրավունքների պաշտպանությունը մշտապես գտնվում է իր ուշադրության կենտրոնում, նաև վստահեցրել, որ նման ձևաչափով հանդիպումները կրելու են շարունակական բնույթ։