Ավինյանը և Փամբուխչյանն իրար դեմ չեն կարող լինել
Քաղաքականություն
Երևանի ավագանու ընտրություններին կեղծ և մանիպուլյատիվ տեղեկությունների պակաս չի զգացվում, առաջիկայում էլ չի զգացվելու։ Արդեն քանիցս մի շարք լրատվամիջոցներ տեղեկություններ են տարածել, իբր իշխող «Քաղաքացիական պայմանագրում» լուրջ տարաձայնություններ կան կուսակցության նախընտրական ցուցակի առաջին համարի, ասել է թե` քաղաքապետի թեկնածու Տիգրան Ավինյանի և նախընտրական շտաբի պետ Արմեն Փամբուխչյանի միջև, այդ թվում` տեղակալների հարցով։
Այսօր էլ նոր տեղեկություն հայտնվեց, թե երկար քննարկումներից ու խժդժոցներից հետո ՔՊ նախընտրական շտաբի պետի տեղակալների հարցը լուծվել է՝ շտաբի պետ Արմեն Փամբուխչյանի տեղակալներն են ՔՊ խմբակցության պատգամավոր Վիլեն Գաբրիելյանը և ՏԿԵ նախարար Գնել Սանոսյանը: Նման հակասություններ փնտրողները պարզապես մոռանում են, որ նախընտրական շտաբի պետը կամ նրա տեղակալները, որպես այդպիսին, պետական պաշտոնյա չեն հանդիսանում։ Դա կազմակերպչական ծանր և պատասխանատու աշխատանք է, որի արդյունքները գնահատվում են կոնկրետ ստացված տոկոսներով և քվեներով։
Ցանկացած կուսակցություն ըստ անհրաժեշտության է որոշում՝ ում նշանակել շտաբի պետ կամ նրա տեղակալ, որոնք էլ ցուցակը գլխավորողների, ավագանու թեկնածուների հետ պատասխանատու են, թե կազմակերպչական խնդիրների, թե hավաքած քվեների համար։ Հետևաբար, շտաբի պետի կամ նրա տեղակալների հարցով գզվռտոց որոնելով ու մամուլով հրամցնելը պարզապես ժամավաճառություն է, հանրությանը կեղծ օրակարգերի մատուցում, ինչն ընդամենը խցանելու է իրական տեղեկատվական հոսքերը, փաստարկված քննադատությունը։ Ուստի, այսպիսի լուրերն առաջին հերթին ձեռնտու են հենց իշխող ուժին։
Եթե ընդդիմության կամ նման կեղծ լուրեր տարածողների հույսն այն է, որ իշխող ուժի շտաբում իրար են ուտելու և արդյունքում իրենք քվեներ են հավաքելու, ապա կարելի է նրանց ցավակցել։ Որովհետեև երբեք չի լինում, որ շտաբի պետն ու թեկնածուն գզվռտոցի մեջ լինեն։ Ցանկացած ձախողում, միևնույն է, բոլորինն է, և հետևանքները շատ որոշակի են լինում՝ պաշտոնի կամ դրա հեռանկարի կորստի տեսքով։ Ինչը, առնվազն, նշանակում է, որ Ավինյանը, Փամբուխչյանն ու մյուսներն իրար դեմ չեն կարող աշխատել։
Վահե Կարապետյան
