Ինչ իրավիճակ է այս պահին Արցախում
ՀասարակությունԱյս պահին Աղդամ-Ասկերան ճանապարհը արցախցիները շարունակում են փակ պահել․ ՍիվիլՆեթի հետ զրույցում հայտնեց ակցիայի մասնակից Դավիթ Եղիազարյանը։
«Մենք երեկ երեկոյան ենք միացել։ Նպատակը՝ թույլ չտալ, որ Ադրբեջանի վերահսկողության տակ գտնվող տարածքից որևէ բեռ մտնի Արցախ, քանի որ Ադրբեջանը դրանով փորձելու է ցույց տալ, թե Արցախը շրջափակված չէ, և պարտադրել, որ Արցախի պարենային ողջ մատակարարումն իրականացվի Ադրբեջանի տարածքից»,- ասաց նա։
Եղիազարյանը նաև տեղեկացրեց, որ իշխանության ներկայացուցիչները՝ ամենաբարձր մակարդակով, երեկ այցելել են Ասկերան և տեղացիներին ներկայացրել են, որ Աղդամից ապրանք գալուց անմիջապես հետո բացվելու է Լաչինի միջանցքը, իսկ Աղդամից բեռները չընդունելու դեպքում, հնարավոր է, որ Ադրբեջանը սահմաններին լարի իրավիճակը, ընդհուպ՝ լայնամասշտաբ պատերազմ սկսի։
Սեպտեմբերի 9-ին ռուսական Կարմիր խաչի միջոցով Աղդամով հումանիտար օգնություն է ուղարկվել Արցախ, պայմանավորվածություն է ձեռք բերվել վերականգնել հումանիտար բեռնափոխադրումները Լաչինի միջանցքով։ Այդ մասին հայտնեց Արցախի տեղեկատվական շտաբը։
«Ռուսաստանի Դաշնության կառավարությունը հանդես է եկել Արցախի Հանրապետությանը հումանիտար օգնություն տրամադրելու նախաձեռնությամբ՝ հաշվի առնելով մեր հանրապետությունում ստեղծված հումանիտար ճգնաժամը: Օգնությունը, որը պարունակում է ռուսական արտադրության կենսական նշանակության ապրանքներ, օրերս Արցախ է ուղարկվել ռուսական Կարմիր խաչի միջոցով՝ այդ կազմակերպության մեքենաներով: Արցախի իշխանությունները, ելնելով Ադրբեջանի կողմից իրականացվող լիակատար շրջափակման հետևանքով առաջացած սուր հումանիտար խնդիրները մեղմելու անհրաժեշտությունից, որոշել են թույլ տալ Ասկերան քաղաքով ռուսական բեռների մուտքը մեր հանրապետություն»,- ասված է Տեղեկատվական շտաբի հաղորդագրությունում։
Ավելի վաղ ադրբեջանական լրատվամիջոցները հաղորդել էին, որ ռուսական Կարմիր խաչը ուտելիքներով ու առաջին անհրաժեշտության ապրանքներով բարձվել է Ռուսաստանի տարածքում ու Ադրբեջանով շարժվում է դեպի Աղդամ:
Ավելին՝ այստեղ
