«Երջանիկները ընթերցում են և սրճում» վեպը` հայերեն
ՖոտոՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Ֆրանսիացի հոգեբան Անյես Մարտեն-Լյուգանի «Երջանիկները ընթերցում են և սրճում» վեպը, որը փոթորկել է միլիոնավոր ընթերցողների հույզերը, 10 տարում վաճառվել է 3,5 մլն օրինակով, թարգմանվել 35 լեզուներով: Այն այժմ հասանելի է նաև հայ ընթերցողին հայերեն Newmag հրատարակչության նախաձեռնությամբ և ներկայացվել Francofest ֆրանսագիր գրականության փառատոնի շրջանակում: Գիրքը թարգմանել է լրագրող Հասմիկ Առաքելյանը
Ինչպես հաղթահարել վիշտը, երբ ապրելու փոխարեն ուզում ես մեռնել: Ֆրանսիական այս վեպը կորստի ցավը մեղմելու և կյանքի նոր իմաստ գտնելու մասին:
Հոգեբան Անյես Մարտեն-Լուգանը գրական աշխարհին հայտնի դարձավ 2012-ին մայրական արձակուրդի ժամանակ: Երեկոյան հյուրասենյակում նստած հետևում էր իր առաջնեկ Սիմոնի խաղին ու ամուսնուն, ու այդ ժամանակ էլ մտքով անցնում է, թե ինչ կպատահեր իր հետ, եթե նրանց կորցներ։ Այդ միտքը նրան դրդում է վեպ գրել, որն Ամազոնում տեղադրելուց երեք շաբաթ անց ամենաընթերցված գրքերի ցանկում գերազանցել էր նույնիսկ «Մոխրագույնի հիսուն երանգները» էրոտիկ վեպին:
33-ամյա Անյես Մարտեն-Լյուգանն իր գրած առաջին վեպն ավարտելուց հետո ուղարկում է չորս հրատարակչություն, չորսից էլ մերժում է ստանում: Որոշում է գիրքը վաճառել Amazon-ի անկախ ընթերցողների օնլայն հարթակում, հույսով, որ այն կհետաքրքրի գոնե մի քանի հոգու:
Վեպում 30-ամյա Դիանան դժբախտ պատահարի հետևանքով կորցնում է ամուսնուն և հնգամյա դստերը: «Երջանիկներն ընթերցում են և սրճում» անունով գրական սրճարան ունեցող կնոջ համար կյանքի գույները խամրում են: Ինչպես հաղթահարել վիշտը, երբ ապրելու փոխարեն երազում ես մեռնելու մասին: Հոգեբան Անյես Մարտեն-Լյուգանը վեպը գրելիս գործի է դրել իր մասնագիտական բոլոր հմտություններն ու ներթափանցել իր ստեղծած կերպարի հոգեվիճակի մեջ` ներկայացնելով փխրուն կնոջ ապրումների բոլոր երանգները: Բաժին հասած ողբերգությունը վերապրելու և ուժ վերագտնելու հետքերով Լյուգանի հերոսուհին ուղևորվում է Մալարանի անունով իռլանդական խուլ գյուղ, որտեղ էլ զարգանում են վեպի իրադարձությունները:
Թշնամանքից մինչև սեր ընդամենը կես քայլ անելով` Դիանային սիրահարվում ու փորձում է կյանք վերադարձնել նրանից ոչ պակաս վերքերով ու աշխարհից խռոված մի երիտասարդ:
Ֆրանսուհի հոգեբանը տասը վեպի հեղինակ է: Հոգեբանի ձեռագրով շարադրված նուրբ ու զգայուն սյուժեներով ու երկխոսություններով Լյուգանի հերոսներն անմիջապես հարազատ են դառնում ընթերցողին:
Հոլիվուդյան պրոդյուսերները 2015-ին արդեն գնել են Լյուգանի «Երջանիկները ընթերցում են և սրճում» բեսթսելլերի էկրանավորման իրավունքը, որ աշխարհին կինոլեզվով պատմեն Իռլանդիայում կյանք վերադարձող ֆրանսուհի Դիանայի պատմությունը:
