Տիգրան Ավինյանը մեկ տարի ժամանակ ունի

Երևանի ավագանու ընտրությունների ինտրիգը մեծ հաշվով այլևս անցյալում է։ Իշխող «Քաղաքացիական պայմանագիր» կուսակցությանը կհաջողվի Տիգրան Ավինյանին ընտրել քաղաքապետի պաշտոնում և այդ հարցում նրան օգնեց «Հանրային ձայն» կուսակցությունը՝ Վարդան Ղուկասյանի գլխավորությամբ։ Ուշագրավ է, որ սեպտեմբերի 17-ի ընտրություններից հետո, ընտրություններին մասնակից թերևս միակ ուժն ընդհանրապես որևէ կերպ ոչ աղմուկ բարձրացրեց և ոչ էլ իրավիճակին անհարկի շահարկումներ տվեց, հենց «Քաղաքացիական պայմանագիրն» էր, որը ֆորմալ առումով հաղթանակ էր տարել՝ ամենաշատ ձայները հավաքելով։

Այսօր, Ավինյանի ընտրությունից հետո պարադոքսալ իրավիճակ է ստեղծվելու Երևանում։ Ըստ օրենքի՝ Երևանի ավագանին չի կարող Ավինյանին իմպիչմենտի ենթարկել առնվազն մեկ տարի ժամկետով, և նոր քաղաքապետը մեկ տարի ժամանակ ունի լրջորեն աշխատելու, իր աշխատանքի արդյունքները հանրությանը ցուցադրելու լրացուցիչ քաղաքական դիվիդենտներ շահելու համար։

Որքան էլ Նիկոլ Փաշինյանը փորձում էր Երևանի ավագանու ընտրություններում Տիգրան Ավինյանի մասնակցությունը նսեմացնել, անձամբ քաղաքական աստառ հաղորդելով Երևանի ավագանու ընտրություններին, ընտրությունների արդյունքները վկայում են, որ Փաշինյանն ավելի շատ խանգարեց, քան օգնեց, ուստի և այժմ «Քաղաքացիական պայմանագիր» կուսակցության համար չափազանց բարդ իրավիճակ է ստեղծվել, մի կողմից Նիկոլ Փաշինյանի հակառեյտինգն է, մյուս կողմից մեկ տարի անց իմպիչմենտի հանրավոր վտանգը, ուստի և Ավինյանն արդարացնելու միայն մեկ տարբերակ ունի՝ աշխատել մեկ տարի այնպես, որպեսզի այլևս որևէ քաղաքական ուժի ավագանու ներկայացված ընդդիմադիր կուսակցության մտքով չանցնի նրան իմպիչմենտի ենթարկել։ Թեև ավագանու կազմում անցել են հինգ քաղաքական ուժեր, սակայն իշխանությունից բացի մյուս չորսը ռեպուտացիոն լուրջ կորուստներ են ունենալու, ի տարբերություն Տիգրան Ավինյանի, որը բոլոր շանսերն ունի, լուրջ աշխատանք տանելով, արժանանալ երևանցիների հավանությանը։

Անի Բաբայան