Նիկոլ Փաշինյանի ինքնահակասող պնդումներն ու «կռուտիտները»
ՔաղաքականությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Հանրային հեռուստաընկերությանը տված հարցազրույցում ասաց վարչապետ Նիկոլ Փաշինյանը արել է մի շարք հակասական հայտարարություններ, որոշ դեպքերում հակասելով ինքն իրեն:
Դիցուք՝ խոսելով այսպես կոչված անկլավների մասին՝ նա հայտարարել է․ «29 800 քկմ մեջ մտնում է նաև Արծվաշենը. ՀՀ ոչ մի իշխանություն և ներկայացուցիչ իրավունք չունի խաչ քաշել ՀՀ այդ ինքնիշխան տարածքի վրա: Բայց այստեղ կա նաև մի կարևոր նրբություն. ով էլ խոսի անկլավների մասին, պետք է սեղանին դնի քարտեզ: Ենթադրենք, երբ ընդունվեց անկլավի հետ կապված պրոբլեմատիկա, դրանից հետո նոր հարցեր են ծագելու` անկլավների սահմանների դելիմիտացիայի, հասանելիության, սահմանների պաշտպանության, այդ տարածքներում ԶՈւ ներկայության և չներկայության, անցման կանոնները. անկլավ նշանակում է` դու պետք է ուրիշի տարածքով անցնես, ոնց պետք է անցնես, ինչ իրավական նրբություն ունի այդ հարցը, և այս պրոբլեմների լուծման մի քանի տարբերակ կա, մեկն այն է, որ այս պրոբլեմները կարգավորում ենք, խաղաղության ֆոնին այդ հարցը լուծվում է, դա` մեկ, երկրորդն այն է, որ մենք տեսնում ենք` այնքան բարդ է, որ պայմանավորվածություն ենք ձեռք բերում, որ սահմանից այն կողմ գտնվող անկլավները մնում են այն երկրների տարածքում, որով պարփակված են, բայց սա էլ պետք է լինի պայմանագրի առարկա»:
Ընդամենն ամիսներ առաջ, սակայն, Նիկոլ Փաշինյանը պնդում էր, որ անկլավների թեման քննարկելու որևէ իրավական հիմք գոյություն չունի։
Խոսելով սահմանին զորքերի կուտակումից՝ Փաշինյանը հայտարարեց, որ որևէ կուտակում չկա: Ահա նրա հայտարարությունը, որն արվել է ընդամենը մեկ ամիս առաջ։
Բացի հակասական մտքերից, Փաշինյանը աչքի ընկավ նաև այսպես ասած՝ «կռուտիտներով»: Դիցուք, նա հայտարարում է, որ Հռոմի ստատուտը օրակարգ է մտել մինչ միջազգայաին քրեական դատարանի կողմից ՌԴ նախագահին կալանավորելու որոշումը, սակայն մոռանում է շեշտել, որ Հայաստանի կողմից այն վավերացվել է արդեն այդ որոշումն ընդունելուց հետո:
Խոսելով ՌԴ հետ հարաբերությունների մասին՝ Փաշինյանը հայտարարեց, որ ոչինչ չի փոխվել: Եվ սա այն դեպքում, երբ հենց նույն օրը վարչապետը հրաժարվել էր մասնակցել ԱՊՀ երկրների ղեկավարների հերթական նիստին, շաբաթներ առաջ հրաժարվել էր մասնակցել ՀԱՊԿ զորավարժություններին և ոչ Փաշինյանը, ոչ էլ իր թիմակիցները չեն զլանում բացահայտ մեղադրել Մոսկվային դաշնակցային պարտավորությունները չկատարելու և թիկունքից հարվածելու մեջ:
Փաշինյանը հայտարարել է, որ նոյեմբերի 9-ի փաստաթուղթը հրապարակային փաստաթուղթ է և յուրաքանչյուրը կարող է այն բացել ու տեսնել, որ այնտեղ ոչինչ գրված չէ ՌԴ կողմից տրանսպորտային կոմունիկացիաների հանդեպ հսկողություն սահմանելու մասին: Մինչդեռ այս հայտարարության մեջ սեւով սպիտակի վրա գրված է, որ Հայաստանը երաշխավորում է Ադրբեջանի արևմտյան շրջանների և Նախիջևանի Ինքնավար Հանրապետության միջև տրանսպորտային հաղորդակցության անվտանգությունը, իսկ տրանսպորտային հաղորդակցությունների հսկողությունն իրականացնում է Ռուսաստանի ԱԴԾ սահմանային ծառայությունը:
Պետք է նաև փաստել, որ Փաշինյանին չհաջողվեց սրբագրել Գրանադայում արձանագրված ֆիասկոն, երբ վերջինս միակողմանի կարգով ճանաչեց Ադրբեջանի տարածքային ամբողջականությունը, իսկ դրանից հետո նրա թիմակիցները հայտարարում էին, որ տարատեսակ միջանցքների թեման այլևս փակ է: Հենց ինքը՝ Փաշինյանն, ընդունեց, որ հարցը փակված չէ և դիսկուսիոն հարթության մեջ է գտնվում, այսինքն՝ որևէ երաշխիք, որ Գրանադայում հռչակագիր ստորագրելով նվազեցվում է ադրբեջանական կողմից նոր ագրեսիայի վտանգը, չկա: Ավելին՝ Թուրքիայից և Ադրբեջանից կրկին հնչում են այսպես կոչված «Զանգեզուրի միջանցք» պահանջող վերջնագրերը:
