«Երկար չմտածեցի, համաձայնվեցի». Ռաֆայել Երանոսյանը՝ «Օպերացիա Մեծապատիվ Մուրացկաններ» ֆիլմի մասին
ԱպրելակերպՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Նոյեմբերի 30-ից բոլոր կինոթատրոններում կցուցադրվի «Օպերացիա Մեծապատիվ Մուրացկաններ» գեղարվեստական ֆիլմը, որի ռեժիսորն Արշալույս Հարությունյանն է, պրոդյուսերը՝ Արման Միտոյանը։ Ֆիլմի գլխավոր հերոսներից է դերասան, հումորիստ Ռաֆայել Երանոսյանը, որը Tert.am Life-ին է վստահել դերի և ֆիլմի մասին բացառիկ մանրամասները:
«Նոր Ռաֆայել Երանոսյան եք տեսնելու, առհասարակ, այս ժանրի ֆիլմ մենք չենք ունեցել: Կարծում եմ՝ այս ֆիլմում հանդիսատեսն ամեն ինչ կտեսնի՝ հումոր, դավաճանություն և արկածային պատմություն: Ավարտն էլ բավականին ինքնատիպ է:Երբ ռեժիսոր Արշալույս Հարությունյանը ներկայացնում էր ֆիլմի գաղափարը, անմիջապես հասկացա՝ ցանկանում եմ ընդունել հրավերը: Ինչ խոսք, Արշոն կարողանում է վարակել գաղափարով, ոգևորում է քեզ և ցանկանում ես բոլոր դերերը փորձել խաղալ: Արշոյի հետ երկար տարիներ եմ աշխատել, նրա պարագայում ես չեմ մտածում՝ վստահում եմ. հետո մեզ միացավ նաև պրոդյուսեր Արման Միտոյանը»,-ասաց Ռաֆայել Երանոսյանը:
Ռաֆայել Երանոսյանը նոր ֆիլմում մարմնավորում է գլխավոր դերակատարին՝ Մանուկին՝ չկայացած ռեժիսորի, որին թատերական ինստիտուտից հեռացրել են իր անհավանական և համարձակ մտքերի համար։ Ռաֆայելի կերպարը փորձում է իր խելահեղ մտքերն իրագործել կյանքում։ Դերասանն անդրադարձավ նաև ԱՄՆ-ից այս ֆիլմի համար հատուկ ժամանած Քեն Դավիդյանի հետ համատեղ նկարահանումներին:
«Իհարկե, մշակութային տարբերություններ կային, ինչպես նաև Քեն Դավիդյանին թվում էր՝ մենք այստեղ ճանաչում չունենք: Հետագայում, երբ նկատել էր, թե ինչպես են մարդիկ մոտենում մեզ, կատակում էր՝ ասելով. «Այ տղա, դու աստղ ես փաստորեն»: Նկարահանումները բավական բարդ էին, ի վերջո, Քենը նաև լեզվի խնդիր ուներ, սակայն իսկապես մտերմացանք՝ արդյունքում միասին լավ աշխատանք մի մաս դարձանք»,- պատմեց դերասանը:
Դատելով ֆիլմի պաշտոնական թրեյլերից՝ Ռաֆայել Երանոսյանի և Վիկտորիա Սահակյանի մասնակցությամբ համբույրի տեսարան կա: Ըստ դերասանի՝ մի փոքր դժվար է տրվում նման տեսարանը մի մարդու հետ, ում հետ աշխատում ես նույն թատրոնում և ընկերներ եք:
«Երբ մարդուն սիրում ես որպես ընկեր, գործընկեր, աշխատանքի ընթացքում պարզապես տարվում եք գործով՝ չհասկանալով, թե ինչպես է դա տեղի ունենում: Մյուս կողմից՝ Հայաստանում ենք ապրում, նույն թատրոնում ենք աշխատում, իհարկե, այդ անհարմարությունը սկզբում կար, քանի որ մենք մի ընտանիքի անդամներ ենք, սակայն հանուն աշխատանքի ամեն բան էլ հաղթահարվում է: Ի դեպ, հենց այս շրջանից էլ նախընտրում եմ հերքել իմ և Վիկտորիայի սիրավեպի հավանական քննարկումները, որոնք վստահ եմ՝ պրեմիերայից հետո լինելու են»,- մանրամասնեց Ռաֆայել Երանոսյանը:
Հավելենք, որ «Օպերացիա Մեծապատիվ Մուրացկաններ» ֆիլմի գաղափարն ի սկզբանե ծնվել է Արշալույս Հարությունյանի մոտ, իսկ սցենարը գրել է սցենարիստ Նարեկ Ավագյանի հետ։
Ֆիլմում որպես գլխավոր դերակատարներ հանդես են եկել Ռաֆայել Երանոսյանը, Քեն Դավիդյանը, Լուիզա Ներսիսյանը, Սոս Ջանիբեկյանը, Վիկտորիա Սահակյանը, Լևոն Հախվերդյնաը, Արսեն Սաղաթելյանը, Գրիշա Աղախանյանը և այլք:
