Թուրքիայի նախագահ Ռեջեփ Թայիփ Էրդողանը կոչ է արել բնակչությանը հոգ տանել երկրի ջրային պաշարների մասին՝ անվտանգության հետ կապված խնդիրներից խուսափելու համար։ Նրա խոսքով՝ Թուրքիան չունի ոչ մի կաթիլ ջուր, որը կարող է «վատնվել»։
Ավելի վաղ Թուրքիայի գյուղատնտեսության նախարար Իբրահիմ Յումակլին կոչ էր արել բնակչությանը մոբիլիզացնել ջանքերը և «զգայուն մոտեցում» ցուցաբերել՝ կապված երկրում ջրի պակասի հետ։
«Մեր երկրի պարենային անվտանգությունը երաշխավորելու ճանապարհը ջրային ռեսուրսների անվտանգ և արդյունավետ օգտագործումն է: Հակառակ տարածված կարծիքի, մենք ջրառատ երկիր չենք», - երկուշաբթի օրը Անկարայում ասել է Թուրքիայի ղեկավարը:
Ըստ նրա՝ ջրի ամենաշատ կարիք ունեցող ոլորտներն են գյուղատնտեսությունն ու սննդի արդյունաբերությունը։
«Թուրքիան ջրի պակասից տառապող երկրներից է: Մենք ստիպված ենք կիսել արդեն սահմանափակ ջրային ռեսուրսները մեր հարևանների հետ, ինչպիսիք են Իրաքը և Սիրիան: Թուրքիան ոչ մի կաթիլ ջուր չունի, որ վատնի: Մեր ջրային ռեսուրսների աղտոտումը դավաճանություն է: Մենք պետք է հիշենք, որ ապագա սերունդները նույնպես իրավունք ունեն ունենալ այն ջրային ռեսուրսները, որոնք մենք ժառանգել ենք: Մենք կարող ենք կանխել վատնումը՝ մեր առօրյա կյանքում պարզ միջոցներ ձեռնարկելով»,- ասել է Թուրքիայի ղեկավարը:
Թուրքիայում ջրի սակավության խնդիրը միջազգային մակարդակի վրա է: Դրա լուծման ուղղությամբ թուրքական իշխանությունների ձեռնարկած գործողությունները հարուցում են հարեւան երկրների բացասական արձագանքը։ Վերջին տարիներին Սիրիան և Իրաքը ևս բախվել են քաղցրահամ ջրի սակավության հետ կապված խնդիրների:
Նշենք, որ նոյեմբերին Սիրիայի գյուղատնտեսության նախարար Հասան Քաթանան ՌԻԱ Նովոստիին ասել էր, որ «Սիրիան տառապում է Եփրատի պատճառով», քանի որ Թուրքիան խախտում է միջազգային նորմերը՝ դադարեցնելով Սիրիա և Իրաք ջրամատակարարումը։ Իր հերթին, Իրաքի ջրային ռեսուրսների նախարար Աուն Զիյաբ Աբդալլան գործակալությանը հայտնել էր մտավախությունների մասին, որ Թուրքիայի կողմից Տիգրիս գետի վրա կառուցվող Ջիզրե ամբարտակը կարող է կրճատել ջրի հոսքը դեպի Իրաք ավելի քան կեսով:
