Ինչո՞ւ է աղմկում ՔՊ-ական քարոզչամեքենան

Գործող վարչախմբին սպասարկող մամուլը վերջին օրերին իսկական հիստերիա է բարձրացրել՝ մեղադրանքների սլաքն ուղղելով նոր ձևավորվող ընդդիմադիր քաղաքական շարժումների ուղղությամբ, տարբեր ու անհեթեթ մեղադրանքներ տարածելով նրանց հասցեին։ Պատճառը, թերևս, մեկն է՝ տարրական վախը ընդդիմադիր դաշտի բյուրեղացումից և ամրապնդումից, որը մահու չափ ահաբեկում է վարչախմբի ներկայացուցիչներին։ Ուստի, բնավ պետք չէ զարմանալ, որ երբ Նիկոլ Փաշինյանի իշխանության հիմքերին իրական վտանգ է սպառնում, իշխանական ու մերձիշխանական մամուլը, նրանց սպասարկուները, ստատուսագիրները ու «քաղաքագետները» աղմուկ են բարձրացնում։

Օրերս հայտնի դարձավ, որ «Հայոց Արծիվներ. Միասնական Հայաստան» կուսակցությունը միացել է «Համահայկական ճակատ» շարժմանը։ Երկու ուժերի առաջնորդները հուշագիր էին ստորագրել Մոսկվայում, հռչակել, որ ընդհանուր առաջնահերթ խնդիր ունեն՝ հայոց պետականության պահպանումը, արտաքին և ներքին անվտանգության ամրապնդումը, Հայ առաքելական եկեղեցու հետ համագործակցությամբ ազգային միասնության և պետականության հետագա զարգացման ապահովումը։ Պաշտպանության նախկին նախարար, գեներալ-մայոր Արշակ Կարապետյանի և «Հայոց Արծիվներ. Միասնական Հայաստան» կուսակցության նախագահ, Արցախյան երեք պատերազմների մասնակից, գնդապետ Խաչիկ Ասրյանի համագործակցությունը, կարծես, քնահարամ է արել գործող վարչախմբին, մի քանի ուղղություններով թունոտ հոդվածներ են գրում, մեկնաբանություններ անում, կեղտոտ հակաքարոզչություն իրականացնում։ Հասկանում են, թե ով է վտանգ ներկայացնում իրենց սիրելիի պաշտոնավարմանը, ումից պիտի իրապես վախենան։ Եվ առաջիկայում, վստահաբար, այս ընդդիմադիր ուժերը վարչախմբի հիստերիայի նոր ալիքի պատճառը կդառնան։