Առանց մաքսատուրքի էլեկտրամոբիլների ներկրման կարգի մեջ փոփոխություններ են եղել. ինչու են դժգոհում ֆիզիկական անձինք կառավարության որոշումից
Հասարակություն
2024թ. ընթացքում ԵԱՏՄ ԱՏԳ ԱԱ (Եվրասիական տնտեսական միության արտաքին տնտեսական գործունեության ապրանքային անվանացանկ /խմբ/) 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների՝ ՀՀ ներմուծումը թույլատրվում է 0 տոկոս ներմուծման մաքսատուրքերի դրույքաչափի կիրառման պայմանով՝ 8,000 հատից ոչ ավելի ծավալով, որից 200 ընկերության կողմից ներկրվել է 2,353 մեքենա, իսկ 4,559 ֆիզիկական անձանց կողմից՝ 5,647 մեքենա:
Tert.am-ը էլեկտրական շարժիչով մեքենա ներկրող ֆիզիկական անձանցից բողոք էր ստացել, թե խոշոր ընկերությունները 2025 թվականի համար 0 տոկոս մաքսատուրքով էլեկտրական շարժիչով մեքենաներ են ներկրում, հետո մաքսատուրքը հաշված, ավելի թանկ վաճառում այստեղ՝ ՀՀ-ում:
Նշենք, որ Կառավարության որոշմամբ, 2025 թվականից առանց մաքսատուրքի ՀՀ ներմուծվող 8,000 մեքենաներից 5,000-ը կներկրեն ընկերությունները, 3,000-ը՝ ֆիզիկական անձինք:
Tert.am-ը գրավոր հարցմամբ դիմել է Պետական եկամուտների կոմիտե՝ պարզելու համար, թե քանի էլեկտրական շարժիչով մեքենա է ներկրվել 2024-ի ընթացքում, դրանցից քանիսն են ներկրել ֆիզիկական անձինք, քանիսը՝ ընկերությունները: Ինչպես նաև փորձել է հասկանալ, եթե բաժանումը՝ մեքենաներից 5,000 ընկերություններն են ներկրել, 3,000-ը՝ ֆիզիկական անձինք,գործելու է 2025-ից, ապա 2024-ին ընթացակարգն ինչպե՞ս է եղել:
ՊԵԿ-ի պատասխանից պարզ է դառնում, որ 2024թ-ի ընթացքում ֆիզիկական անձինք ավելի շատ էլեկտրական շարժիչով մեքենա են ներկրել, քան ընկերությունները, ինչը 2025-ի համար կանխվել է կառավարության որոշմամբ:
Եվ այսպես, ՊԵԿ-ից նշել են, որ ՀՀ կառավարությունը 28.12.2023 թ. ընդունել է «2024 թվականի ընթացքում ՀՀ տարածք ներմուծվող ԵԱՏՄ ԱՏԳ ԱԱ 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների նկատմամբ սակագնային արտոնություն կիրառելու և ներմուծման ընթացակարգը հատատեկլու մասին» (10.102024թ. թիվ 1589-Ն որոշման խմբագրությամբ) թիվ 2307-Ն որոշումը, որով սահմանված է, որ 2024թ. ընթացքում ԵԱՏՄ ԱՏԳ ԱԱ 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների՝ ՀՀ ներմուծումը թույլատրվում է 0 տոկոս ներմուծման մաքսատուրքերի դրույքաչափի կիրառման պայմանով՝ 8,000 հատից ոչ ավելի ծավալով:
ՀՀ կառավարությունը 28.11.2024թ. ընդունել է «ՀՀ տարածք ներմուծվող ԵԱՏՄ ԱՏԳ ԱԱ 8703 80 000 2 ծածկագրին դասվող էլեկտրաշարժիչով շարժիչային տրասնպորտային միջոցների նկատմամբ 2025 թվականի ընթացքում սակագնային արտոնություն կիրառելու և ներմուծման ընթացակարգը հաստատելու մասին» թիվ 1876-Ն որոշումը, որն ուժի մեջ է մտնում պաշտոնական հրապարակմանը հաջորդողը օրվանից և տարածվում է 2025 թվականի հունվարի 1-ից ծագած հարաբերությունների վրա, ինչպես նաև կիրառվում է 2024 թվականի ընթացքում ներմուծված և 2025 թվականի ընթացքում ձևակերպվող ԵԱՏՄ ԱՏԳ ԱԱ 8703 80 000 2 ծածկագրին դասվող տրանսպորտային միջոցների նկատմամբ:
Ըստ այդ որոշման առաջին կետի՝ ՀՀ տարածք ներմուծվող ԵԱՏՄ ԱՏԳ ԱԱ 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների (այսուհետ՝ ապրանքներ) «Բացթողում ներքին սպառման համար» մաքսային ընթացակարգով ձևակերպումը կամ, որպես, անձնական օգտագործման տրանսպորտային միջոց, ազատ շրջանառության համար բացթողումը 2025 թվականի ընթացքում թույլատրվում է 0 տոկոս ներմուծման մաքսատուրքի դրույքաչափի կիրառման պայմանով՝ 8000 հատից ոչ ավելի քանակով, որից՝ 1. ԵԱՏՄ ԱՏԳ ԱԱ 8703 80 000 2 ծածկագրին դասվող 5000 հատից ոչ ավելի քանակով ապրանքների՝ ՀՀ տարածք ներմուծումը թույլատրվում է սույն կետի 2-րդ ենթակետում (ստորև)չնշված սուբյեկտներին (այդ թվում՝ ֆիզիկական անձանց). 2)ԵԱՏՄ ԱՏԳ ԱԱ 8703 80 000 2 ծածկագրին դասվող 3000 հատից ոչ ավելի քանակով ապրանքների՝ ՀՀ տարածք ներմուծումը թույլատրվում է բացառապես անմիջապես ավտոարտադրողի հետ կնքված դիլերական-դիստրիբյուտորական պայմանագրի (համաձայնագրի) շրջանակներում ներմուծում իրականացնող սուբյկետներին:
Նշենք նաև, որ ըստ նույն որոշման 2-րդ կետի՝ որոշմամբ, 1-ին կետի 1-ին ենթակետով սահմանված սակագնային արտոնությունից օգտված սուբյեկտները չեն կարող օգտվել նույն կետի 2-րդ ենթակետով սահմանված սակագնային արտոնությունից, իսկ 1-ին կետի 2-րդ ենթակետի սակագնային արտոնությունից օգտվածները՝ նույն կետի 1-ին ենթակետով սահմանված սակագնային արտոնությունից:
Ըստ ՊԵԿ-ի՝ 2024 թվականի մինչև դեկտեմբերի 18-ի դրությամբ, 8703 80 000 2 ծածկագրով ՀՀ ներմուծված էլեկտրական շարժիչով տրանսպորտային միջոցները 200 ընկերության կողմից ընդհանուր թվով եղել է 2,353 հատ, որից՝ Չինաստան՝ 1,680, ԱՄԷ՝ 430, Հոնկոնգ՝ 126, Վրաստան՝ 42, Միացյալ Նահանգներ՝ 40, Գերմանիա՝ 25, Բելգիա՝ 2, Կորեա՝ 3, ԻԻՀ՝ 2, Շվեյցարիա՝ 1, Չեխիայի Հանրապետություն՝ 1, Ֆրանսիա՝ 1:
4,559 ֆիզիկական անձից էլեկտրամեքենաներ ընդհանուր թվով ներկրել է 5,647, որից Միացյալ նահանգներ՝ 3,624, Չինաստան՝ 969, ԱՄԷ՝ 642, Վրաստան՝ 245, Գերմանիա՝ 82, ԻԻՀ՝ 54, Բելգիա՝ 9, Ճապոնիա՝ 7, Կորեա՝ 3, Իտալիա՝ 2, Կանադա՝ 2, Անհայտ երկիր՝ 1, Բուլղարիա՝ 1, Էստոնիայ՝ 1, Նիդերլանդներ՝ 1, Նորվեգիա՝ 1, Շվեդիա՝ 1, Չեխիայի Հանրապետություն՝ 1, Ֆրանսիա՝ 1:
