4:4 հաշիվը հավասար հնարավորություններ է թողնում «Բարսելոնա»-ի հետ դիմակայությունում. «Աթլետիկո»-ի գլխավոր մարզիչ
Սպորտ
Մադրիդի «Աթլետիկոյի» արգենտինացի գլխավոր մարզիչ Դիեգո Սիմեոնեն մեկնաբանել է 4:4 հաշվով ոչ ոքին «Բարսելոնայի» հետ Իսպանիայի գավաթի խաղարկության կիսաեզրափակչի առաջին խաղում։
«2:4 հաշիվը խնդիր կլիներ «Բարսելոնայի» հետ պատասխան հանդիպումից առաջ, բայց 4:4 հաշիվը հավասար հնարավորություններ է թողնում այս դիմակայությունում։ Բաց խաղ էր, մրցակիցը շատ բարդ է, բայց մենք ունենք մեր գործիքները։
Հանդիպման ընթացքում հասկացա, որ մեզ ավելի թարմ խաղացողներ են պետք կենտրոնում, եւ Կոռեայի հետ մենք ստացանք խորություն եւ համարձակություն, որպեսզի վերջնամասում գրոհեինք։ Սյորլոտը ուժեղացրեց կազմը, իսկ Խուլիան Ալվարեսն անհավանական աշխատանք կատարեց։ Վերջում զգացողություն էր, որ կարող ենք նաեւ հաղթել»,- Սիմեոնեի խոսքը մեջբերում է Marca-ն։
Բարսելոնայում տեղի ունեցած հանդիպման առաջին 6 րոպեից հետո «Աթլետիկոն» հաղթում էր 2:0 հաշվով, սակայն 74-րդ րոպեին արդեն պարտվում էր 2:4 հաշվով։ Վերջնամասում «Աթլետիկոն» կարողացավ եւս երկու գոլ խփել։
Պատասխան հանդիպումը Մադրիդում տեղի կունենա ապրիլի 2-ին։
