Անչափ դժվար ժամանակներ ենք ապրում, ուղղակի պետք է ունենալ նպատակ և պայքարել անխնա. Ջուլֆալակյանը Պանամերիկայի խաղերում արծաթե մեդալ է նվաճել

Հայաստանի Օլիմպիական փոխչեմպիոն, ըմբիշ Արսեն Ջուլֆալակյանը Պանամերիկայի խաղերում նվաճել է արծաթե մեդալ: Նա մրցագորգ է վերադարձել 38 տարեկանում՝ չնայած երկարատև դադարներին և աշխատանքային զբաղվածությանը:

Ջուլֆալակյանն իր գրառման մեջ նշել է, որ վերադարձը պայմանավորված է ոչ թե նոր տիտղոս նվաճելու ցանկությամբ, այլ նպատակով՝ հաղթահարելու պարտության զգացումը և ապացուցելու, որ նպատակադրումն ու պայքարը կարևոր են ցանկացած ոլորտում: Նա շնորհակալություն է հայտնել Արգենտինայի ըմբշամարտի ֆեդերացիային՝ մրցմանը մասնակցելու հնարավորություն տալու համար, ինչպես նաև հայրենիքին՝ Հայաստանին:

«Հաղթանակի օրով, հաղթանակի մասին

Եթե մեկն ինձ մի քանի տարի առաջ ասեր, թե 38 տարեկանում դեռ դուրս եմ գալու մրցագորգ՝ մրցելու, կժպտայի:

Բայց գործընթացներն այնպես ընթացան, որ չնայած աշխատանքային ծանրաբեռնվածությանս, նախ վերադարձա ակտիվ սպորտ՝ կարիերայիս 4-րդ Օլիմպիական խաղերի համար (ժամանակին վաստակածս այդ իրավունքն ուղղակի գողացվել էր ինձանից…), և ապա երեկ՝ հենց ծննդյանս օրը, դարձա Պանամերիկայի փոխչեմփիոն:

Շնորհակալ եմ Արգենտինայի ըմբշամարտի ֆեդերացիային՝ այս հնարավորությունն ընձեռելու համար:
Եվ իհարկե հայրենիքիս՝ Հայաստանին, որի շնորհիվ այն եմ, ինչ կամ:

Վերջին ամսիներին տարբեր մարդիկ հարցնում էին, թե ինչի՞ս է պետք, երբ ունեմ բոլոր այդ նվաճումները:

Այս քայլին գնալու պատճառը բնավ սպորտային նոր տիտղոս նվաճելու նպատակը չի եղել: Այլ ցանկությունը դուրս գալու համազգային/անձնական անվերջ թվացող պարտության շղթայից, ամոթից, նվաստացումից, երբ պետական ամենաբարձր մակարդակով մեզ փորձում են համոզել, որ թույլ, լուզեր լինելն է ճիշտ, հաղթելը հայի մասին չէ…

Անչափ դժվար ժամանակներ ենք ապրում: Հուսամ, այս հաղթանակով, թեկուզ և սպորտային, հնարավոր կլինի ևս մեկ անգամ ապացուցել, որ անհնար բան չկա: Ուղղակի պետք է ունենալ նպատակ և պայքարել անխնա՝ դրան հասնելու համար:

Շնորհավոր Մայիսի 9»,- գրել է Ջուլֆալակյանը ֆեյսբուքյան իր էջում։