Բերձոր քաղաքի վերաբերյալ բոլոր հայտարարությունները իրարամերժ են, հստակ կարգավիճակ մեզ ոչ-ոք չի հայտնում․ Բերձորի բնակիչներ

Երևանի մետրոպոլիտենի երիտասարդական կայարանի մոտակայքում Արցախի Հանրապետության Քաշաթաղի շրջանի Բերձոր և Աղավնո համայնքների բնակիչները, իրականացնում էին ակցիա՝ հասկանալու համար այդ համայնքների կարգավիճակը։

«Մենք ցանկանում ենք հասկանալ Բերձորի և բերձորցիների կարգավիճակը, մենք չենք հասկանում՝ ինչ կարգավիճակում ենք մենք, միայն իրարամերժ հայտարարություններ են հնչում, մեկ ասում են՝ վերադարձեք, մեկ՝ մի վերադարձեք, կամ ասում են՝ Բերձորը հայկական է, կամ էլ՝ ոչ այն հայկական չէ, ոչ մի հստակ կարգավիճակ չկա, եթե այն հայկական չէ, մեզ հարկավոր է իմանալ, որպեզսի նաև իմանանք մեր հետագա անելիքները, իսկ եթե հայկական է, մենք պետք է իմանանք թե ինչպես են երաշխավորելու մեր հետագա կյանքը այդ պայմաններում, երբ չորս կողմից շրջափակված ես թշնամիներով», - Արմեն Մովսիսյան՝ Բերձորի բնակիչ։

Բերձորի բնակիչներից մեկը նշեց, որ նրանք բաց նամակ են ուղարկել ՀՀ-ի կառավարությանը, քանի որ այն օգնությունները, որ նրանք տալիս են բացարձակապես ոչ-ոքի չի հասել․ «Քանի որ ծրագիրը սխալ է կազմված, ինչ-ինչ պատճառներով մենք ընգրկված չենք որևէ սոցիալական ծրագրի մեջ, մարդիկ որոնք արդեն երկար տարիներ է ինչ չեն ապրում Քաշաթաղում, նրանք կարողացել են օգտվել այդ ծրագրից, իսկ մարդիկ, որոնք 44 օր եղել են Քաշաթաղում, և առհասարակ ապրել ենք Արցախում, նրանք այդ ծրագրերից չեն կարողանում օգտվել»։

Նելլի Թաթոսյանը, որը նույնպես Բերձորի բնակիչ է նշեց, որ մարդկանց այնպիսի անորոշ պատասխաններ են տալիս, որ նրանք իրենց տներն էին վառում, դուռ ու լուսամուտները ջարդում, անգամ ոմանք չէին հասցնում, քանի որ իրենց տները արդեն թալանված էին լինում․ «Հարցը հետևյալն է՝ եթե Բերձորը հայկական է, ապա պետք է Ստեփանակերտի, և մնացած տարածաշրջանների, քաղաքների նման մեր անվտանգությունն էլ ապահովեն, պետք է ենթակառուցվածքները աշխատեն, որպեսզի մարդիկ կարողանան վերադառնալ, և այդ ամենը վերաբերում է նաև Աղավնո գյուղին, իսկ եթե Բերձորը հայկական չէ, պետք է արդեն դրանից բխող վտանգները հաշվի առնել»։