Սննդաբանը խորհուրդ է տվել որոշ մթերքներ տեղափոխել սառցախցիկ
Ապրելակերպ
Սննդաբան և աղիքների առողջության մասնագետ Ջեմմա Ստյուարտը նշել է, որ հինգ մթերք, որոնք շատերը սովորաբար պահում են սառնարանում, պետք է տեղափոխել սառցախցիկ: Նրա խոսքերը փոխանցում է Infobae-ն:
Ինչպես նշել է Ստյուարտը, սպանախը, ոլոռը, եգիպտացորենը, ավոկադոն և հաղարջը պարունակում են մեծ քանակությամբ վիտամիններ և միկրոտարրեր: Այս մթերքները հասնում են իրենց ամենաբարձր սննդային արժեքին, եթե օգտագործվեն անմիջապես հավաքելուց հետո, և ժամանակի ընթացքում կորցնում են իրենց օգտակար հատկությունները:
«Սակայն, եթե այս մթերքները սառեցվեն, դրանց մեջ առկա բոլոր սննդարար նյութերը կպահպանվեն»,- վստահեցրել է սննդաբանը:
Ինչ վերաբերում է հետագա ջերմային մշակմանը, ոլոռի և սպանախի դեպքում նա խորհուրդ է տվել նախապատվությունը տալ կարճատև եռացմանը կամ գոլորշիով պատրաստմանը: Հաղարջը կարելի է ավելացնել աղանդերներին և յոգուրտներին, եգիպտացորենը իդեալական է աղցանների և խավարտների համար, իսկ ավոկադոն պետք է օգտագործել սմուզիների համար:
