«Մենք փոքր էինք այն ժամանակ, երբ նրանք Վիտամին էին անում». 10 տարի անց Vitamin club-ը վերադառնում է
Ֆոտո
10 տարի անց Vitamin club-ը վերադառնում է՝ նոր ծրագրով, նոր սցենարով, նոր հումորով և նույն դեմքերով:
«Մեծ անակնկալ էր, երբ իմացանք, որ Վիտամին ակումբը Միացյալ Նահանգներում միջոցառում է ուզում կազմակերպել ու շատ ուրախացա, որ ես էլ եմ ընդգրկված»,- Tert.am Life-ի հետ զրույցում ասաց Պոնչը՝ Տարոն Իսպիրյանը:
Պոնչից բացի ներկա են լինելու Չարենցը, Բոնին, Արամ MP3-ին, Տիգրանը Գևորգյանը, Արմուշը և Վաչեն Թովմասյանը: «Այնպիսի թիմ է հավաքվել, որ կարծես տարբեր սերունդների բախում է: Մենք փոքր էինք այն ժամանակ, երբ նրանք Վիտամին էին անում, մենք էլ մասնակցում էինք նրանց հետ: Հիմա արդեն մեծ պատիվ է, որ Միացյալ Նահանգներում 10 տարի հետո ելույթ ենք ունենալու «Վիտամին ակումբ»-ում»,- նշեց Տարոն Իսպիրյանը:
1 ու կես ժամ տևողությամբ ելույթի սցենարն արդեն պատրաստ է, իսկ փորձերը կսկսվեն, երբ թիմին միանա նաև Վաչե Թովմասյանը:
«Լրիվ նոր հումորային ծրագիր է լինելու, Վիտամինի ոճին համապատասխան: Սցենարը գրել են Չարենցն ու Ռոբերտ Մարտիրոսյանը, բայց տղաները նույնպես մասնակցություն են ունեցել: Վաչեն շուտով կգա Հայաստան և կսկսենք փորձերը, թեև կարող ենք որոշ բաներ նաև օնլայն փորձել, բայց ուրախ ենք, որ գալիս է, կարոտել ենք: Սեպտեմբերին բոլորս կմեկնենք Միացյալ Նահանգներ ու ամսի 19-ին արդեն ելույթ կունենանք հայ հանդիսատեսի համար։ Շատ ուրախ եմ, որ «Վիտամին ակումբ»-ը դեռ սիրողներ կան, որովհետև տոմսերն արդեն վաճառվում են»,- Tert.am Life-ի հետ զրույցում պատմեց Պոնչն ու հավելեց, որ շատ հնարավոր է Հայաստանում ևս ելույթ ունենան:
Պոնչն արդեն 15 տարի բեմում է և նկատում է, որ ասպարեզում շատ բան է փոխվել:
«Առաջին քայլերս սկսել եմ ստենդափից՝ ակումբային ժանրից: «32 ատամ»-ում եմ սկսել, որտեղ լիքը դժվարություններ եմ հաղթահարել: Երբ արդեն «Վիտամին ակումբ»-ում ելույթ ունեցանք, մեծ ճանաչում ձեռք բերեցինք, բոլորը սկսեցին ճանաչել մեզ: Հիմա բոլորը հումոր են անում, բայց ես կարծում եմ՝ պետք է տարանջատել լավ հումորը վատ հումորից»,- ամփոփեց Տարոն Իսպիրյանը:
