«Եթե չբարձրանայի, ինձ կյանքում չէի ների». հարցազրույց Զեմֆիրայի համերգի ամենազգացմունքային պահի հերոսի հետ
Ապրելակերպ
13-ամյա Գագիկը Զեմֆիրայի հետ բեմում
Հուլիսի 4-ին կայացած Զեմֆիրայի երևանյան համերգը երկար կհիշվի ոչ միայն երաժշտական հույզերով, այլև աննախադեպ տեսարանով՝ 13-ամյա Գագիկը բարձրացավ բեմ ու գրկեց իր սիրելի արտիստին։ Այդ տեսարանը տարածվեց համացանցում, հուզեց հազարավոր մարդկանց, իսկ Tert.am Life-ը գտավ Գագիկին։ «Եթե ես հենց այդ պահին բեմ չբարձրանայի, ինձ կյանքում չէի ների»,- Tert.am Life-ի հետ զրույցում ասաց Գագիկը:
«Զեմֆիրայի հետ հանդիպելը միշտ երազանք էր»
Գագիկն ասում է՝ բեմ բարձրանալու մասին որոշումը վաղուց էր կայացրել. «Նախապես էի որոշել։ Միշտ երազել եմ իմ սիրելի արտիստներին հանդիպել։ Զեմֆիրան առաջինն էր, ու դա իմ կյանքի պահն էր»։ Բայց կոնկրետ որ պահին կբարձրանա, նա չէր նախատեսել․ «Ուղղակի բախտս բերեց, որ հենց իմ ամենասիրած երգերից մեկի ժամանակ կարողացա բարձրանալ»։
«Ասաց՝ հանգստացի, արդեն երգել ենք ու պարել»
Երբ Գագիկը բարձրացավ բեմ, Զեմֆիրան նրան դիմավորեց զարմանալի քնքշությամբ․ «Երբ հետնաբեմ գնացինք, ինքը ասաց՝ վերջ, հանգստացիր արդեն, երգել ենք, պարել ենք, էլ մի՛ լացիր, հիմա քեզ կուղեկցեն ծնողներիդ մոտ: Ասացի, որ ծնողներիս հետ չեմ։ Նա շատ ջերմ էր»։ Այդ պահին Գագիկը Զեմֆիրայի մեջ բացահայտեց մի բան, որ մինչև այդ միայն կռահում էր․ «Ես միշտ գիտեի, որ ինքը բարի է, բայց էդ պահին զգացի, թե ինչքան բաց ու հոգով մարդ է»։
«Նույն օրը Ինստագրամը բացեցի ու... ամենուր մենք էինք»
Համերգից անմիջապես հետո տեսարանները տարածվեցին համացանցում, ու Գագիկն առավոտյան զարմացած հայտնաբերեց, որ ինքը հազարավոր մարդկանց հիացրել է։ «Պատկերացնում էի, որ կտարածվի, բայց ոչ այսքան։ Նույն գիշերն արդեն իմ նկարներն ամենուր էին։ Շատ զարմացած ու հուզված էի։ Բոլորն ասում էին՝ ապրի էս տղան, ուժեղ էր»։ Մեկնաբանություններում բոլորը նրան կոչում էին համարձակ, իսկ Գագիկը խոստովանում է՝ դա իր համար ևս իսկապես մեծ քայլ էր․ «Ինձ համար համարձակ քայլ էր։ Շատ երկար ժամանակ համոզում էի ինձ։ Վերջում ասացի՝ եթե հիմա չանեմ, կյանքում չեմ ների ինձ»։
«Ես Զեմֆիրա 9 տարեկանից եմ լսում»
Շատերը զարմացած էին՝ ինչպես է մի պատանի այդքան խոր զգում Զեմֆիրայի երաժշտությունը, որը սովորաբար 90-ականների սերնդի սրտին է մոտ։ «Իմ բախտը բերել է ծնողներիս հարցում: Մայրիկիցս եմ առաջին անգամ Զեմֆիրա լսել։ 9 տարեկանից արդեն լսում եմ։ Ուրիշ էմոցիաներ են»։
«Տատիկս ու հայրս ասացին՝ դե պատմիր ո՞նց ստացվեց»
Գագիկի տուն վերադառնալուց հետո ամենից սպասված հարցը եղել է տատիկից ու հայրիկից․ «Շատ ուրախ էին։ Ասացին՝ ապրես։ Բարեկամներս, նույնիսկ արտասահմանում ապրողները, ասում էին՝ մեր երազանքներն ես իրականացրել»։ Նկարվել չհասցրեց, բայց ոչինչ․ «Այդ պահին նկարն ինձ պետք չէր։ Ուղղակի շատ երջանիկ էի։ Էմոցիաներս հաղթել էին ամեն ինչին»։
Զեմֆիրան հետադարձ կապ տվեց
Համերգից հետո, չնայած տեխնիկական խնդիրներին, Գագիկը կարողացել է հաղորդագրություն ուղարկել Զեմֆիրային․ «Նամակ գրեցի, ասացի՝ սա իմ կյանքի նվերն էր։ Զեմֆիրան հետ գրեց իր օգնականի համարից՝ «Շատ ուրախ էի քեզ հանդիպել, հուսամ՝ ամեն ինչ լավ կլինի»։ Այդ կարդալուց էլի հուզվեցի»,- Tert.am Life-ի հետ զրույցում պատմեց Գագիկը:
Գագիկը 13 տարեկան է, ունի 3 եղբայր, 2 քույր, սովորում է գրաֆիկ դիզայն, մասնակցում է AI կրթական նախագծերի․ «Մեր նպատակը՝ հինգ տարում մեկ միլիոն հայի դարձնել AI գրագետ։ Որովհետև AI-ն օգնում է 10 անգամ ավելի արդյունավետ լինել»,- ասում է Գագիկը:
«Երբեմն մի րոպեի համարձակ քայլը փոխում է ոչ միայն օրը, այլև ամբողջ ապագան»,-կարծում է Գագիկը: Նրա պատմությունը հենց այդպիսին է։
