Ոսկե Ծիրան 2025-ի շրջանակներում կցուցադրվի «Անորա»-ն. Կարեն Կարագուլյանի և Վաչե Թովմասյանի մասնակցությամբ կկազմակերպվի ֆիլմի քննարկում

Հուլիսի 13-ից 20-ը Երևանում կանցկացվի «Ոսկե ծիրան» 22-րդ միջազգային կինոփառատոնը, որի բացման արարողությունը տեղի կունենա Կինոյի տանը:

Փառատոնի մեկնարկին նվիրված առաջին մամուլի ասուլիսի ժամանակ փառատոնի համահիմնադիր և նախագահ Հարություն Խաչատրյանը նշեց, որ փառատոնը ոչ միայն մեծ նշանակություն ունի կինոյի տարածման համար, այլև դարձել է հարթակ, որտեղից սկսում են փայլել հեղինակավոր մրցանակների արժանացող ֆիլմեր ու ստեղծագործողներ։  «22 տարի անընդմեջ այս փառատոնը իրականացնելն ինքնին հերոսություն է։ Մեր ճանապարհը դժվար է եղել, բայց փառատոնը դարձել է բարի նշան՝ ովքեր այստեղից սկսել են, արժանացել են միջազգային բարձր գնահատականի», -նշեց նա։

«Ոսկե ծիրան» կինոփառատոնի տնօրեն և գեղարվեստական ղեկավար Կարեն Ավետիսյանը հայտարարեց, որ «Ոսկե ծիրանը» մոտենում է կարևոր հանգրվանի․ փառատոնը պատրաստվում է ընդգրկվել աշխարհի հեղինակավոր կինոփառատոնների հավատարմագրված ցանկում, որի հաստատումը սպասվում է 2025-ի վերջից մինչև 2026-ի սկիզբը։ Նա նաև շեշտեց՝ սա կդարձնի «Ոսկե ծիրանը» տարածաշրջանում եզակի և միջազգային ճանաչում ունեցող իրադարձություն։

«Այս տարի Թամարա Ստեփանյանի ֆիլմի համաշխարհային պրեմիերայով կմեկնարկի Լոկառնոյի կինոփառատոնը, որն իր մասնակցությամբ և թեմատիկայով ամբողջությամբ կապված է Հայաստանի հետ։ Դա իսկական հաղթանակ է մեզ համար»,- նշեց Ավետիսյանը։

Այս տարի «Ոսկե ծիրանը» մեծապես ներկայացված կլինի իրանական կինոյի ուղղությամբ։ Հարգանքի տուրք կմատուցվի ռեժիսոր Աբբաս Քիառոստամիի հիշատակին՝ նրա լուսանկարների բացառիկ ցուցահանդեսով Հայաստանի ազգային պատկերասրահում։ Հատուկ հյուր կլինի նշանավոր իրանցի ռեժիսոր Ամիր Նադերին։ Մեկ այլ կարևոր հյուր կլինի Աֆրիկայի հռչակավոր ռեժիսոր Աբդեռահման Սիսակոյի, ով կղեկավարի միջազգային ժյուրին»:

Միջազգային բաժնի ղեկավար Վարվարա Հովհաննիսյանն ասաց, որ այս տարի փառատոնի հիմնական ծրագիրը կներառի մի շարք ֆիլմեր, որոնք Կաննի մրցանակակիր են և դեռ չեն ցուցադրվել այլ փառատոններում։ Այդ թվում՝ Դարդեն եղբայրների նոր ֆիլմը, Ջաֆար Փանահիի վերջին աշխատանքը, Քրիստիան Պեցոլդի նոր ֆիլմը և այլք։ «Այս տարի մրցութային ծրագրերում մեծ տեղ է տրվել նաև հայկական ֆիլմերին՝ թե՛ սկսնակ ռեժիսորների, թե՛ փորձառուների։ «Կորիզ» կարճամետրաժ ֆիլմերի ծրագիրը ներկայացնելու է նորահայտ անուններ, իսկ տարածաշրջանային մրցույթը կբացի Քրիստինե Հարությունյանի «Երազելուց հետո» ֆիլմը, որի պրեմիերան տեղի է ունեցել Բեռլինում»,- ասաց նա։

Փառատոնը կփակվի Հարություն Խաչատրյանի «Վերջին կայարանը» ֆիլմով, որը երկար ժամանակ չի ցուցադրվել Հայաստանում։

Նախատեսված են նաև մի շարք մասնագիտական աշխատարաններ, այդ թվում՝ եռօրյա օպերատորական դասընթաց, ինչպես նաև դերասանների քասթինգի միջազգային աշխատարան՝ իտալացի մասնագետի ղեկավարությամբ։ Սա կարող է հայ դերասանների համար դառնալ միջազգային նախագծերում ընդգրկվելու եզակի հնարավորություն»,- ընդգծեց Վարվարա Հովհաննիսյանը։

Բացի Հարություն Խաչատրյանի «Վերջին կայարանը» ֆիլմի ցուցադրությունից, այս տարի «Ոսկե Ծիրան» միջազգային կինոփառատոնը կնշի նաև փառատոնի հիմնադիր նախագահի՝ Հարություն Խաչատրյանի 70-ամյակը։  Փառատոնի շրջանակում հուլիսի 18-ին կբացվի նաև Շառլ Ազնավուրի արձանը՝ Շառլ Ազնավուր հրապարակում՝ ի հիշատակ աշխարհահռչակ շանսոնյեի:

Այս տարվա կինոփառատոնի հատուկ հյուրերի շարքում կլինեն նաև Վաչե Թովմասյանը և Կարեն Կարագուլյանը։ Շոն Բեյքերի «Անորա» ֆիլմը, որը Կաննի կինոփառատոնում արժանացել է բարձր գնահատականի, կցուցադրվի Երևանում, իսկ ֆիլմի հետ կապված քննարկումները կտեղափոխվեն Հայաստան՝ հնարավորություն տալով տեղի հանդիսատեսին անմիջական երկխոսության միջազգային ճանաչում ունեցող հեղինակների հետ։