Ռուսաստանը կշարունակի մարդասիրական օգնությունը Արցախից տեղահանված մեր հայրենակիցներին

Արցախի հայաթափումից հետո ավելի քան 120 հազար հայաստանցի հարկադրված տեղափոխվեց Հայաստան՝ սկսելով նոր կյանք՝ զրկված տարրական պայմաններից, առաջին անհրաժեշտության ապրանքներից և, առավել ևս, սեփական տանից։ 44-օրյա պատերազմից հետո և հատկապես՝ տեղահանությունից հետո, Ռուսաստանի Դաշնությունը տարբեր կառույցների միջոցով հետևողականորեն մարդասիրական օգնություն է տրամադրել՝ փորձելով մեղմել արցախցիների ծանր կենցաղային և սոցիալական խնդիրները։

Վերջին նման նախաձեռնությունը արդեն մեկնարկել է․ Ռուսաստանը հերթական օգնության խմբաքանակն է ուղարկել Արցախից տեղահանվածների համար։ Օգնության տրամադրումն իրականացվում է «Ռուսական հումանիտար առաքելություն» կազմակերպության կողմից՝ «Ռուսաստանը ձեզ հետ է» ծրագրի շրջանակներում՝ «Ռոսսոտրուդնիչեստվո» դաշնային գործակալության աջակցությամբ։ Գործընթացին ակտիվորեն մասնակցում են տեղական ինքնակառավարման մարմինները, կամավորական խմբերը և անհատներ։

«Այս նախաձեռնությունն առավել քան նյութական աջակցություն է․ այն համերաշխության, մարդկային ջերմության և մասնակցության դրսևորում է մեր հայրենակիցների հանդեպ։ Սա ժողովրդական դիվանագիտության իրական օրինակ է՝ ի ցույց դնելով, որ մեր ժողովուրդները պատրաստ են իրար աջակցել դժվար պահերին։ Լեռնային Ղարաբաղի և նրա բնակիչների ողբերգությունը՝ որոնցից շատերն այսօր դարձել են հաշմանդամներ ու կարիքավորներ, իրականություն է, որին մենք չենք կարող անտարբեր մնալ։ Ռուսաստանը տարիներ շարունակ աջակցել է տեղահանված արցախցիներին, և այդ աշխատանքը շարունակվելու է»,- նշել է «Ռոսսոտրուդնիչեստվո»-ի ղեկավարի տեղակալ Իգոր Չայկան։

Օգնական փաթեթներն արդեն հանձնվել են Մասիսում ապաստանած տեղահանվածներին և առաջիկայում կհասցվեն նաև Հայաստանի այլ համայնքներ, որտեղ ժամանակավոր ապաստան են գտել արցախցիները։ Ընդհանուր առմամբ, ծրագիրը նախատեսում է շուրջ 140 տոննա սննդամթերքի և հիգիենայի պարագաների տրամադրում՝ շուրջ 30 հազար շահառուների համար։ Ամեն փաթեթ պարունակում է 25 կգ առաջին անհրաժեշտության մթերք, հիգիենայի պարագաներ, ինչպես նաև մանկական սնունդ՝ երեխաների համար։

Սակայն, ցավոք, այս մարդասիրական նախաձեռնությունն անպատասխան չի մնացել նաև որոշ շրջանակների կողմից քննադատության։ Քննադատները, հիմնականում՝ արևմտամետ կազմակերպություններն ու անհատները, փորձում են ստվեր նետել ծրագրի վրա՝ նույնիսկ կոչ անելով արցախցիներին հրաժարվել ռուսական օգնությունից՝ ներկայացնելով այն որպես անարժանապատիվ։ Սա այն դեպքում, երբ հենց ՀՀ իշխանությունների թողտվությամբ տարիներ շարունակ կրճատվել է պետական աջակցությունն Արցախի բռնի տեղահանվածներին։ Շատերն այսօր մենակ են մնացել սոցիալական, բնակարանային ու հոգեբանական խնդիրների առաջ, առանց պետական հոգածության։

Ի հակադրություն՝ նույն այդ իշխանությունները կարող են պետական բյուջեից հսկայական գումարներ հատկացնել Ջենիֆեր Լոպեսի համերգի կազմակերպման համար, որը կայացավ օգոստոսի 3-ին՝ ներգրավելով ավելի քան 30 հազար հանդիսատես, որոնցից 15 հազարը՝ արտերկրից։ Մինչդեռ, արցախցիների աջակցության ծրագրերն անընդհատ կրճատվում են, իսկ առաջիկայում նույնիսկ կարող են ամբողջությամբ դադարեցվել։

Այս իրադրության ֆոնին, Ռուսաստանի նախաձեռնությունը ոչ միայն օրինակելի մարդասիրական քայլ է, այլև քաղաքական ու բարոյական պատասխանը՝ բոլոր նրանց, ովքեր փորձում են խաթարել հայ-ռուսական ավանդական կապերն ու անտեսել հազարավոր մարդկանց ճակատագրերը։

Արցախահայությունը շարունակում է արժանապատվորեն պայքարել օրվա հաց վաստակելու համար՝ չկորցնելով հպարտությունը և դիմադրության ոգին։ Այս համատեքստում, ռուսական օգնությունը պետք է ոչ թե քամահրվեր, այլ ընդունվեր երախտագիտությամբ՝ որպես իրական բարեկամության ու եղբայրական աջակցության արտահայտություն։