Արցախը մեր ապագայի անբաժան մասն է, և այդ ապագան մենք կերտելու ենք միասին․ Նաիրի Սարգսյան
Քաղաքականություն
Ուղիղ երկու տարի առաջ՝ 2023 թվականի սեպտեմբերի 19-ին, Ադրբեջանը գործադրեց լայնածավալ ռազմական ագրեսիա Արցախի դեմ։ Տասը ամիս շրջափակման մեջ գտնված Արցախի ժողովուրդը դարձավ էթնիկ զտման և բռնի տեղահանումների զոհ։ Սա հանցագործություն է մարդկության դեմ, որի իրականացումը հնարավոր դարձավ ոչ միայն Ադրբեջանի ագրեսիվ քաղաքականության, այլև Հայաստանի իշխանությունների անգործության ու միջազգային հանրության լռության պայմաններում։ Այս մասին ֆեյսբուքյան իր էջում գրել է «Հայաստանը ես եմ» նախաձեռնության ղեկավար Նաիրի Սարգսյանը:
«Սակայն մենք, որպես դարերի պատմություն ունեցող ժողովուրդ, չենք պատրաստվում հաշտվել այս անարդարության հետ։ Արցախը մեր պատմության, մեր հավատքի և մեր ինքնության անբաժան մասն է։ Ոչ մի բռնի ուժ չի կարող ջնջել հայի հիշողությունն ու կամքը։
Այսօր մենք դատապարտում ենք իրականացված հանցագործությունը, բայց միևնույն ժամանակ վստահ հայտարարում․ Արցախը նորից պիտի լինի հայերով բնակեցված, և հայկական դրոշը նորից պիտի ծածանվի մեր հողի վրա։
Արցախը մեր ապագայի անբաժան մասն է, և այդ ապագան մենք կերտելու ենք միասին։
Մեր պայքարը շարունակական է»,- գրել է նա:
