Փաշինյանը Վաղարշապատը «քարտ-բլանշ» է գնահատում, որ գրոհի Վեհարանը

Վաղարշապատում տեղի ունեցած խայտառակ ընտրությունները աղաղակող ահազանգ են ընդդիմության համար, որ չհամախմբվելու, առնվազն երկու խոշոր թևերով խորհրդարանական ընտրություններին չգնալու դեպքում նույնը սպասվում է նաև համապետական մակարդակով, և Փաշինյանին կհաջողվի, օգտվելով օրենքի սողանցքներից և վարչական ռեսուրսի կիրառումից, վերազավթել իշխանությունը Հայաստանում։ Տեղի ունեցած ընտրությունների արդյունքներով «Քաղաքացիական պայմանագիրը» ստացել է 48,5% ձայն, բայց և հաջողացրել առաջ անցնել բոլոր մրցակիցներից և արդյունքում առնվազն 19 մանդատ ստանալով, միանձնյա կգլխավորի համայնքը։ Վաղարշապատն առանձնակի նշանակություն ուներ Նիկոլ Փաշինյանի համար։

Այստեղ պարտվելու դեպքում նա լրջագույն խնդիրներ էր ունենալու, և արդյունքում ՔՊ-ն կենաց–մահու կռիվ տվեց։ Իսկ ընդդիմությունը, չմիավորվելով, ձայները փոշիացնելով, հնարավորություն տվեց գործող իշխանություններին ստանալու իրենց ուզածը։ Ավելին, Վաղարշապատի ընտրությունների արդյունքները Փաշինյանն արդեն իսկ դիտարկում է որպես Մայր Աթոռը գրոհելու և կաթողիկոսին գահընկեց անելու «քարտ–բլանշ»։

Զուր չէ, որ իր առավոտյան ուղերձում հատուկ նշել է. «Ձեր ընտրությամբ կարևոր լիցք տվեցիք մեր սրբության սրբոցը՝ Մայր Աթոռ Սուրբ Էջմիածինը Կտրիճ Ներսիսյանից ազատելու գործընթացին», փաստացի հաստատելով, որ կաթողիկոսի դեմ արշավանքը ուժգնանալու է և նոր թափ է ստանալու։ Իսկ Վաղարշապատում ընդդիմությունից լավագույն ցուցանիշը ցույց տվեց «Հաղթանակ» դաշինքը՝ Սևակ Խաչատրյանի գլխավորությամբ, որին կհաջողվի 12 մանդատ ստանալ։

Արմատական ընդդիմադիր «Մայր Հայաստան» կուսակցությունն էլ կունենա 2 մանդատ։ Փաշինյանի կոալիցիոն գործընկերը՝ «Հանրապետություն» կուսակցությանը, 30 ձայն չհերիքեց, չկարողացավ հաղթահարել 4 տոկոսի անհրաժեշտ շեմը։ Սա էլ ահազանգ էր արևմտամետների համար, որ իրենց եվրոպական խոսույթը առանձնակի ուշադրություն չի արժանանում հանրության կողմից։

Աննա Մարգարյան