Ձյան առատ տեղումները կաթվածահար են արել Մադրիդը
Ապրելակերպ
Վերջին տարիների ամենաուժեղ ձյունը, որը սկսել էր տեղալ Մադրիդում նախօրեին եւ մինչ այժմ չի դադարում, գրեթե ամբողջովին կաթվածահար է արել Իսպանիայի մայրաքաղաքի կյանքը, հայտնում է ՏԱՍՍ-ը:
Իսպանիայի պետական օդերեւութաբանական գործակալությունը շաբաթ օրը նախազգուշացում է հայտարարել երկրի շատ նահանգներում, որոշներում եղանակային վտանգի մակարդակը կարմիր է հայտարարվել: Նախօերին վատ տեսանելիության եւ թռիչքուղիների վիճակի պատճառով դադարեցվել էր Մադրիդ-Բարախաս միջազգային օդանավակայանի աշխատանքը, մասնավորապես, չեղարկվել է 27 չվերթ: Օդանավակայանների պետական վարչությունը (AENA) Twitter-ում հայտարարել էր, որ շաբաթ օրը, անվտանգության նկատառումներից ելնելով, Բարախասի աշխատանքը նույնպես դադարեցվում է:
Աղետի պատճառով խաթարվել է երկաթուղու աշխատանքը որոշ ուղղություններով: Քաղաքապետարանը հայտարարել է, որ շաբաթ օրը վատ եղանակի պատճառով ավտոբուսները չեն գործի, մետրոյի աշխատանքում եւս խափանումներ են: Մադրիդի բնակիչներին հորդորել են զերծ մնալ անձնական տրանսպորտային միջոցների օգտագործումից: Տեղական ԶԼՄ-ների հաղորդմամբ` տասնյակ վարորդներ ստիպված գիշերել են Մադրիդի Ինքնավար Համայնքի ձյունապատ ճանապարհներին մնացած իրենց ավտոմեքենաներում: Նրանց օգնության տրամադրման օպերացիային մասնակցում են նաեւ զինվորականները, ովքեր փորձում են մաքրել երթուղիները:
Սպասվում է, որ օրվա ընթացքում Մադրիդում ձյան ծածկը կգերազանցի 20 սմ-ն:
